له‌سه‌رهێل 505
یه‌ک شه‌مه‌ 13 سه‌رماوه‌ز 2722
سازمانی خه‌باتی کوردستانی ئێران
رێورەسمی 10ی خەزەڵوەر رۆژی پێشمەرگەی سازمانی خەبات بە شێوەی ئونلاین بەڕێوە چوو

رۆژی یەكشەممە 15ی خەزەڵوەری 1401ی ك خ، رێكخستنی دەر ەوەی سازمانی خەبات رێورەسمێكی بەبۆنەی 10ی خەزەڵوەر رۆژی پێشمەرگەی سازمانی خەباتی كوردستانی ئێران بەرێوەبرد.
لە سەرەتادا کاک عەلی بەهرامی لە ووتەێکی کورتدا باسی لە گرینگی ڕۆژی پێشمەرگەی سازمانی خەبات و بەخێرهاتنی بەشدارانی مەڕاسمەکەی کرد.
لە رێورەسمەكەدا كە بە بەشداری كاك بابەشێخ حوسێنی سكرتێری گشتی و ژمارەیەك لە ئەندامانی سەركردایەتی و كادر و ئەندامانی سازمان لە دەرەوەی وەڵات بەرێوەچوو، بە سرودی نەتەوەیی ئەی رەقیب و دەقیقەیەك وەستان بۆ رێز و وەفا بۆ گیانی پاكی شەهیدانی كورد و كوردستان دەستی پێكرد.
پاشان كاك بابەشێخی حوسێنی سكرتێری گشتی سازمان پەیامێكی پێشكەش كرد و ئیشارەی بە رۆڵ و پێگە و زەحمەت و ماندووبوونی پێشمەرگەی سازمانی خەبات كرد وتی: پێشمەرگەكانی سازمانی خەبات هەر زوو لەبەرامبەر هێرش و پەلاماری هێزە داگیركەرەكانی رژیمی ئاخوندی هاتنە دەست و لە چەندین بەرەوە بەرپەرچیان دانەوە. بەتایبەت لە داستانی 10ی خەزەڵوەری 1358دا شكستێكی سیاسی و سەربازی گەورەیان تووشی رژیمەكەی خومەینی كرد.
لە پێوەند بە خەباتی شێلگیرانەی هێزی پێشمەرگە لەبەرامبەر رژیمدا بەرێزیان ئیشارەیان بەو خاڵەدا كە پێشمەرگەكانی سازمانی خەبات هەر لە سەرەتاوە پێیان وابوو كە پێویستە لەبەرامبەر هێزە بەكرێگیراوەكانی رژیمی ئاخوندی خەباتێكی جیددی لێبڕاوانە بكرێ و هەر جۆرە نەرمیێكیان لەگەڵ ئەو دەسەڵاتە خۆسەپێنە رەت كردەوە.
لە پێوەند بە روانگەی سازمان لە سەر چۆنیەتی كاری و چالاكی هێزی پێشمەرگە كاك بابەشێخ گوتی: سازمانی خەبات هەر لە رۆژانی سەرەتاوە پێی وابوو كە هێزی پێشمەرگە دەبێ بە یەكڕیزی و هاوئاهەنگی بۆ بەرپەرچی هێزە داگیركەرەكانی رژیمی ئاخوندی ڕێکبخرێن.
بەرێز سكرتێری گشتی لە وتارەكەیدا لە پێوەند بە شۆرشی ژینا بە پێشەنگایەتی ئافرەتانی خۆراگر وتی: رژیمی ئاخوندی بە توندترین و دڕندانەترین شێوە لەگەڵ راپەریوانی 1401 هەڵسووكەوت دەكات هەر بۆیە نارەزایەتی هێمنانە و ئاشتیخوازانە لەگەڵ وەها دەسەڵاتێكی دڕندە مانای نیە و هەر نەوعە هەنگاوێكی ئاشتیخوازانە لەگەڵ دەسەڵاتی ئاخوندی زیانی بە خەبات و موبارەزەی خەڵكی كوردستان داوە. هەر لەو سۆنگەوە پێویستە راپەریوان بەو جۆرەی لە توانایاندایە و بۆیان هەڵدەسووڕێ خەبات و شۆرشەكە بەرنە پێش و تا روخانی یەكجاری ئەو دەسەڵاتە بەردەوام بن. هەروەها بەرێزیان ئیشارەی بە هەڵوێستی سازمانی خەبات لەو پێوەندەدا و وتی: سازمانی خەباتی كوردستانی ئێران رێز لە داوای ئافرەتانی كوردستان و ئێران بۆ هاتنەدیی كۆمەڵگەیەكی ئازاد و یەكسان و دەسەڵاتێكی دادپەروەر دەگرێ و پشتیوانی لێ دەكا.
لە دوای پەیامی كاك بابەشێخ سرودێك پێشكەش كرا كە لەلایەن كۆڕی هونەری سازمانەوە ئامادە كرابوو.
دوای ئەو سرودە پەیامی رێكخراوی ئافرەتانی خەباتی كوردستانی ئێران لەلایەن خاتوو شنۆ شەرێعەتپەنا پێشكەش كرا.
پاشان كاك رێبواری حوسێنی پەخشانە شیعرێكی خۆی پێشكەش كرد كە تایبەت بوو بە 10ی خەزەڵوەر.
بەبۆنەی 10ی خەزەڵوەرەوە رێكخراوی لاوانی خەباتی كوردستانی ئێران پەیامێكیان هەبوو كە لەلایەن كاك هەڵۆ حوسێنی خوێندرایەوە.
كورتە فیلمێك لەبارەی 10ی خەزەڵوەر رۆژی پێشمەرگەی سازمانی خەبات پێشكەش كرا كە لەلایەن بەشی راگەیاندنی سازمانەوە ئامادەكرابوو.
دوا بڕگەی بەرنامە رێورەسمەكە تایبەت بوو بە سرود و گۆرانی شۆرشگێڕانە.

ڕێکه‌وت: 2022-11-06 18:54:17
به‌شی ( چالاکیه‌کان )



خوێنه‌ر ده‌توانێ ئه‌و وتاره‌ له تۆڕه‌کۆمه‌ڵایه‌تیه‌کان بڵاوبکاته‌وه‌‌
ناونیشای وتار: رێورەسمی 10ی خەزەڵوەر رۆژی پێشمەرگەی سازمانی خەبات بە شێوەی ئونلاین بەڕێوە چوو