له‌سه‌رهێل 482
یه‌ک شه‌مه‌ 13 سه‌رماوه‌ز 2722
سازمانی خه‌باتی کوردستانی ئێران
کوردستان پێشەنگ و پێشڕەوی بەرخۆدان

ماردین زاهدی
لە سەرانسەری دونیا دەگمەنن ئەوانەی کە دەنگی شۆڕشی ژینا یان نەبیستبت. ئەو شۆڕشەی کە بەهۆی شەهیدکرانی نارەوای کچە کوردێکی ۲۲ ساڵان بە ناوی ژینا ئەمینی بە دەستی حكومەتی تاریكپەرەست و دڵ پڕ لە قین، سەری هەڵدا و جیهانی هەژاند.
شۆڕشی ژینا بە دروشمی ژن ژیان ئازادیی و بە پێشەنگایەتی ئافرەتانی بوێر و لاوانی تێكۆش و بێزار لە ستەم، بە مەبەستی روخانی دەسەڵاتی جەهل و جینایەت لە ئێرانی ئاخوند لێدراو، بۆ ئامانجی هێنانەدیی ماف و ئازادیەكان بۆ نەتەوە بندەستەكان، مافی یەكسان و بەرابەر بۆ ئافرەتان، بۆ سڕینەوەی هەموو جۆرە هەڵاواردن و جیاكاریەك لە ئێران لە كوردستانەوە چەخماخەی لێدرا و هەر زوو سەرانسەری ئێرانی گرتەوە.
دیمەنەكانی شۆرشی ژینا ئەوندە حەماسە خولقێنن و بوێری و چاونەترسی ژنان و لاوان نیشاندەدا كە دۆخی رژیمیان قورس و حەستەم كردووە بەجۆرێك كە لە 40 ساڵی رابردوودا ئەو دەسەڵاتە بەو رێژەیە لاواز و بێ توانا و لە روخان نزیك نەبووە. دروشمەكانی شۆرشی ژینا لە هەموو ئێران بووەتە وێردی سەر زمانی هەر لە منداڵی قوتابخانە بگرە هەتا خوێندكاری زانستگا و بازاری و تێكڕای چین و توێژەكانی كۆمەڵەگەی ئێران.
شۆڕشی ژینا توانی شكست بە سیاسەتی دووبەرەكێ ی رژیم لە نێوان نەتەوەكانی ئێران، بێنێ و ئەو نەتەوانە دەست لەنێو دەستی یەکتر پشتیوانی لە یەكتر دەكەن و هەموو بە یەك دەنگ هاواری مەرگ بۆ خامنەیی و ژن ژیان ئازادی سەر دەدەن.
لە دوای 50 رۆژ لە سەرهەڵدانی شۆرشی ژینا، دەبینین كە هەموو نەتەوەكانی ئێران بریندارن و خوێنیان لێ دەچۆڕێ، بەڵام ئەم شۆرشە هەر چۆن لە كوردستان كڵپەی كرد، هەر ئاوایش بووتە هەوێنی بەردەوامی و بەربڵاوبوونەوەی لە هەموو كون و قوژبنێكی وەڵات. وەك بڵێی كوردستان پێشەنگایەتی و پێشرەوی خەباتی ئازادیخوازی بە باڵا دووراوە، رۆژگارێك سەنگەری ئازادی ئێران بوو و لە هەموو ئازادیخوازێكی ئێرانی بۆ ئەوەی بەرپەرچی زوڵم و ستەمی ئاخوندان بداتەوە خۆی دەگەیاندە كوردستان، ئەمرۆیش كوڕان و كچانی كوردەواری مەشخەڵداری شۆرشی ژینان و بڕیاری روخان و لەناوچوونی دەسەڵاتی نەگریس و دواكەوتووی ئاخوندانیان داوەو باقی نەتەوە و پێكهاتەكانی ئێرانیش هەنگاو بە هەنگاو لەگەڵی دەرۆن و پشتیوانی لێ دەكەن.
شۆرشی ژینا رێگەیەكی باشی بڕیوە و كچان و كوڕانی بوێر و تێكۆشەری كوردستان و ئێران بە پێداگری و رادیكاڵتر كردنی دروشمەكان دژ بە دەسەڵاتی ئاخوندی، هەتا دێ ئاگری كورەی ئەم خەبات و بەرخۆدانە زیاتر خۆش دەكەن و هێماكان ئەوەمان پێ دەڵێن كە سەركەوتن زۆر نزیكە و بەم زوانە خۆری ئازادی كورد و نەتەوەكانی دیكەی ئێران لە كەل هەڵدێ. ئەو كاتە ژنان بە مافەكانی خۆیان دەگەن، ژیان دەچێتەوە سەر شاڕێی خۆی و گەلانی ستەم دیتووی ئەو وەڵاتەیش بە ئازادی و بەختەوەری دەژین.

ڕێکه‌وت: 2022-11-10 17:43:06
به‌شی ( سیاسی )



خوێنه‌ر ده‌توانێ ئه‌و وتاره‌ له تۆڕه‌کۆمه‌ڵایه‌تیه‌کان بڵاوبکاته‌وه‌‌
ناونیشای وتار: کوردستان پێشەنگ و پێشڕەوی بەرخۆدان