له‌سه‌رهێل 131
شه‌ممه‌ 15 رێبه‌ندان 2722
سازمانی خه‌باتی کوردستانی ئێران
سازمانی خەباتی كوردستانی ئێران، پشتیوانی لە بانگەوازی سەراسەری 14-15-16ی سەرماوەز دەكا

جەماوەری ڕاپەڕیوی كوردستان!
خەڵكی بێزار لە ستەمی ئێران!
بەپێی بانگەوازی چالاكانی ناوخۆی وەڵات، رۆژەكانی 14-15-16ی سەرماوەز بۆ مانگرتنی گشتی، ناڕەزایەتی و شۆرش دژ بە رژیمی سەركوتگەر و چەوسێنەری ئاخوندی لە سەرانسەری ئێران دیاری کراوە.
ئەم هەنگاو و داواکاریە بو مانگرتنی گشتی بە مەبەستی بەرز ڕاگرتنی ڕاپەڕینی سەرماوەزی 1396ی هەتاویە كە لە ماوەیەكی كورتدا زیاتر لە 120 شاری كوردستان و ئێرانی گرتەوە و رژیمی تووشی شڵەژان كرد.
ئێستا شۆرشی سەراسەری ژینا، نزیك بە 80 رۆژە لە ئارادایە و لە ناوخۆی ئێران جەماوەر هەر چۆنێكی بۆیان دەكرێ لە دژایەتی ئەو دەسەڵاتە درێغی ناكەن و جەماوەری ئێران بە تێکڕا ئەو دەسەڵاتە بە ناڕەوا دەزانن و ئاخوندان دوایین پێگەکانیان لە دەستداوە. هانیشتمانیانی ستەملێکراو!
ئەم داواکاریە گرینگە لە كاتێكدایە٫ شۆرشی ژینا لە كۆمەڵگەی نێونەتەوەییشدا دۆخ و ئیعتیباری رژیمی ئاخوندی تووشی چارەنووسێكی دژوار كردوە بە جۆرێك كۆمەڵگەی نێونەتەوەیی بەتایبەت وەڵاتانی رۆژئاوایی پشتیان لە ئاخوندان كردوەو دەرگاكانی وتووێژیان بە روودا داخستوون. لەگەڵ ئەوانەشدا ئەو وەڵاتانە بەكردەوە كۆمەڵێك هەنگاویان ناوە لە راستای ئابڵوقەدان و دروست كردنی فشاری سیاسی لەسەر ئەو دەسەڵاتە.
هەموو لایەك ئەو راستیە دەزانن كە لە شۆرشی ژینا و بەرەنگاربونەوەی دەسەڵاتی داگیركەر و خۆسەپێنی ئاخوندیدا كوردستان دەوری دینەمۆی ئەو شۆڕشە و كاریگەری لە كڵپە سەندن و گشتگیركردنی خەباتی روخانخوازی و لەگۆڕنانی دەسەڵاتی ئاخوندان هەبوەو نرخی زۆر گرانبەهای بە تێکۆشانی بێ پسانەوەو گیانبازی رۆڵەكانی كوردستان پێشكەش كردوە. لەم شۆرشەشدا رۆڵەكانی نەتەوەی كورد بە خوێنی خۆیان جارێكی دیكە رەوایی و بەرحەق بوونی خەباتی مافخوازانە و ئازادیخوازانەی كوردستانیان مۆر كرد و بۆ هەموو نەتەوەكانی دیكەی ئێرانیان سەلماندەوە كە كوردستان پێشەنگی خەبات و بەرخودانی ئازادیخوازی و بەرەوروبونەی دەسەڵاتە دیكتاتۆرەكانە و دەوری مێژوویی خۆی لەو بارەوە دەبینێ.
لە ئێستاشدا دیسان جەماوەری كوردستان خۆیان بۆ قۆناغێكی دیكەی ئەم شۆرشە ڕەوایە، لە رۆژەكانی 14-15-16ی سەرماوەز ئامادە دەكەن، بە مانگرتن، ناڕەزایەتی و راپەرین، وەڵامێكی جیددی بە برایمی رەئیسی و خامنەیی خوێنڕێژ دەدەنەوە كە هیچ هەوڵێکی فریوكارانەیان لە كوردستاندا سەرناكەوێ و كورد و كوردستانیان بڕیاریان داوە بۆ خەبات هەتا روخانی یەكجاری رژیمی ئاخوندان و هێنانەدیی ئازادی، دادپەروەری كۆمەڵایەتی و چەسپاندنی دروشمی ژن، ژیان، ئازادی بەردەوام بن لە خەبات و ڕاپەڕین.
جەماوەری ئازادیخوازی ئێران!
خەباتی ئازادیخوازی و بەرنگاریی رژیمی ئاخوندی، بە سەرهەڵدانی شۆرشی ژینا چووە قۆناغێكی نوێ و ئەو شۆرشە مەزنە ئێستا نزیك بە 80 رۆژە لە زۆر شار و ناوچەی ئێران بە شێوەی جۆراوجۆر بەردەوامە و ئاخوندانی فاسد و خوێنڕیژی تووشی شكست كردوەو دەسەڵاتەكەیان بە تەواوی لەلایەن جەماوەرەوە لاواز و بێ هێز كراوەو هەموو هەوڵ و كردەوەیەكی ئاخوندان لەلایەن خەڵكی ئێرانەوە پشتگوێ دەخرێ و ڕەت دەكرێتەوە. ئێوە جەماوەری ئازادیخوازی ئێران بە هەموو نەتەوە و دین و مەزهەبێكەوە، بە كەمتر لە روخانی كۆی پێكهاتەی دەسەڵاتی ئاخوندان رازی نین. لە ئێستا دا كە بانگەوازی سەراسەری بۆ رۆژەكانی 14-15-16ی سەرماوەز دراوە، پێویستە بە مانگرتن، ناڕەزایەتی و راپەرین و بە یەکگرتویی ئەو پەیامە روونە بە كۆمەڵگەی نێونەتەوەیی بدەنەوە كە ئەگەر چی رژیم سەركوت دەكا و لە هیچ تاوان و جینایەتێك درێغی ناكا، بەڵام بڕیاری خەڵكی ئێران روخانی دەسەڵاتی ئاخوندان و هێنانەدیی سیستەمێكی ئازاد و دیموكراتیكە و پێویستە كۆمەڵگەی جیهانی لەلایەك پشتیوانی زیاتر و جیددی تر لە شۆرشی گەلانی ئێران بكا و لەلایەكی دیكەوە بە بەڕەسمی ناسینی شۆرشی ژینا و داواكانی خەڵكی ئێران بۆ ئازادی، هەنگاوی جیددی بۆ داخستنی سەفارەت و نوێنەرایەتی و هەموو جاسووسخانەكانی ئەو دەسەڵاتە لە وەڵاتەكانیان هەڵگرن.
هەر بۆیە لە پێناو كۆتایی هێنان بە زوڵم و ستەمی رژیمی ئاخوندی، كۆتایی هێنان بە فەساد و گەندەڵی و چەوسانەوە و بێ مافی نەتەوەكان و گەیشتن بە دیموكراسی و ئازادی لە ئێران، درێژە بە مانگرتن، ناڕەزایەتی و راپەرینەكان لە رۆژەكانی 14-15-16ی سەرماوەز بدەین.
سەركەوێ خەباتی ژینا
بروخێ رژیمی دیكتاتۆر و خوێنڕێژی ویلایەتی فەقیە
سازمانی خەباتی كوردستانی ئێران
كومیتەی ناوەندی
12ی سەرماوەزی 1401

ڕێکه‌وت: 2022-12-03 10:49:14
به‌شی ( به‌یاننامه‌کان )



خوێنه‌ر ده‌توانێ ئه‌و وتاره‌ له تۆڕه‌کۆمه‌ڵایه‌تیه‌کان بڵاوبکاته‌وه‌‌
ناونیشای وتار: سازمانی خەباتی كوردستانی ئێران، پشتیوانی لە بانگەوازی سەراسەری 14-15-16ی سەرماوەز دەكا