خه‌باتمیدیا: ڕۆژی شەممە ١٠ی بەفرانباری ١٤٠١ی هه‌تاوی، (٣١ی دیسەمبەری ٢٠٢٢) لە کاتی بەڕێوەچوونی ڕێوڕەسمی چلەی ٧کەس لە شه‌هیدانی بەرخۆدانی جوانڕۆ، هێزە سه‌رکوتگه‌ره‌کانی ڕژیم ڕاستەوخۆ تەقەیان لە خەڵک کرد و بورهان ئەلیاسی لە ئەنجامی تەقەی ڕاستەوخۆی ئەو هێزانە شه‌هید کرا.
بورهان ئەلیاسی، دووکاندار و تەمەن ٢٢ ساڵ، دوای پێکرانی بە گوله‌ی هێزە به‌کرێگیراوه‌کانی ڕژیم، بۆ نەخۆشخانە گواستراوە و بەهۆی سەختی برینەکانییەوە گیانی لەدەست داوه‌. سه‌ره‌ڕای شه‌هیدکرانی بورهان ئه‌لیاسی، له‌ ئه‌نجامی ته‌قه‌ی ڕاسته‌وخۆی هێزه‌کانی ڕژیم ٨ هاووڵاتی دیکەش بەسەختی بریندار بوون. به‌پێی هه‌واڵی ناوه‌ندی مرۆڤی هه‌نگاو لەنێو بریندارەکاندا منداڵێکیش هەیە و باری تەندروستی دوو کەس لەوان مەترسیدار ڕاگەیندراوە. هێزه‌ به‌کرێگیراوه‌کانی ڕژیم سەرەڕای داخستنی ڕێگاکانی چوون بۆ گۆڕستان، لە ڕێگاکانی دەرەوە و نێو شاردا تەقەیان لە خەڵک کردووە.

ڕێکه‌وت: 2023-01-01 06:08:36
به‌شی ( هه‌واڵی کوردستان )