جەماوەری خۆڕاگری كوردستان!

گەلانی زوڵم لێكراوی ئێران!

كادرو پێشمەرگەو هۆگرانی ڕێبازی سازمانی خەبات!
بە بۆنەی ۲ ی رێبەندان، ۷۷ تەمین ساڵڕۆژی دامەزرانی كۆماری كوردستان، كە بە ڕەنج و تێكۆشانی جەماوەری كوردو بە ڕێبەرایەتی پێشەوا قازی محەممەد لە مەهاباد و چەند شار و ناوچەی كوردستان دامەزرا، پیرۆزبایی گەرم بە تێكڕای هاونیشتمانیانی كوردستان و گەلانی ئێران پێشكەش دەكەین.
دامەزرانی کۆماری کوردستان، دەستكەوتێكی گرینگی نەتەوەیی و نیشتمانیە و پێشەوا قازی محەممەد و هاوكارانی ئامانجیان ڕزگاری و بەختەوەری دانیشتوانی كوردستان بوو.
بێگومان کۆماری کوردستان یەکەم ئەزموونی دەسەڵاتداریی کورد بوو لە چوارچێوی جوغرافیایەكی دیاریكراودا، سەرەڕای كەند و كۆسپ و بەربەستەكانی کە دەخرایە بەردەم كارەكانی، بە خۆشیەوە توانی وەك دەستكەوتێكی نەتەوەیی، كاری باش و بەرچاو لە بوارەکانی: پەروەردە، ئابوری، سیاسی ، کۆمەڵایەتی و ڕۆشنبیری لە كوردستاندا پەرە پێ‌ بدا. بە تایبەت كە پێشەوا قازی محەممەد وەك پێشەوای ئایینی و نەتەوەیی دوور بوو لە هەر فكرو بۆچونێكی بێگانە بە كورد، دەوری بەرچاوی بینی لە دەسەڵاتداری کۆماری کوردستان دا.

خەڵكی كوردستان و تێكڕای گەلانی ئێران و سازمانی خەبات ی كوردستان، لە كاتێكدا یادی كۆماری كوردستان بە ڕێزەوە دەكەینەوە، کە لە تێكڕای شار و ناوچەكانی كوردستان و سەرانسەری ئێراندا، شۆڕشی ژن، ژیان، ئازدی ،،شۆرشی ژینا،، بەردەوامی هەیە و توڕەیی وبێزاری تێکڕای گەلانی ئێران لە دەسەڵاتی دیكتاتۆری ئاخوندی، زیاتر پەرە دەستێنێ‌.
ڕاپەڕین و شۆڕشی ژینا، دەسەڵاتی دیكتاتۆری ئاخوندەكانی تووش دەیان قەیران جۆراو جۆر كردوە و ئاخوندە دەسەڵاتدارەكانی لە بۆمبەستی داماوی و تەریک کەوتنەوە و ڕیسوایی نێونەتەوەیی هێشتۆتەوە.
ڕاپەڕینی بە شكۆی جەماوەری وەزاڵەهاتوو، بە ڕادەیەك بەرین و بەهێزە كە ناوەندە جیهانیەكانی پشتیوانی مافی مرۆف و ووڵاتانی ڕۆژئاوایی، بڕیاری پشتیوانی لە گەلانی ئێران و بە تایبەت ئافرەتانیان دەربڕیوە و بڕیای شیاویان داوە .
ڕاپەڕینی چارەنووس سازی گەلانی ئێران بە پێشڕەوی لاوان، خۆێندكاران، مامۆستایانی ئایینی لە كوردستان و، ئوستادانی دانشگاكاكان و تێكڕِای چین و توێژەكانی جەماوەر چۆتە قۆناغێكی چارەنووس ساز. بە تایبەت تا دێت كۆمەڵگەی جیهانی پشتیوانیەكانی لە گەلانی ئێران زیاتر دەكاو لە ناوخۆی ئێرانیشدا سەرەڕای سەركوت و شەكەنجەو شەهید كردنی زیاتر لە ٦۰۰ ڕۆڵەی كورد و ئێرانی، خۆڕاگرو پایەدارو نەترس لە بەرانبەر ئاخوندەكاندا وێستاون و لە بەرانبەریشدا ئاخوندە دەسەڵاتدارەكانیان،چاوەڕی چارەنووسی ڕەش کردوە.
سازمانی خەبات ی کوردستانی ئێران، مێڕای سەرەخۆشی و هاوخەمی لە گەڵ خانەوادەی شەهیدان، درود دەنێرێ بۆ جەماوەری خۆڕاگر و شۆڕگێر و زیندانیانی سیاسی لە كوردستان و سەرانسەری ئێراندا و داوا لە جەماوەری ڕاپەڕیوی كوردستان و ئێران دەكەین بە یەكگرتوویی و تەبایی بەردەومتان لە بەرانبەر ئەو دەسەڵاتە نگریس و دڕندەیەدا خۆڕاگری بكەن و یەکگرتویی و هاو دەنگیتان زیاتر بکەن.
بێگومان بەو خۆڕاگری و نەبەزیەی جەماوەر، دەسەڵاتی ئاخوندی دەڕوخێ‌ و دیموكراسی و ئازادی لە ئێراندا جێگیر دەبێ‌ و گەلی كورد بە مافە ڕەواكانی دەگا.
لە گەڵ پیرۆزبایی دووبارەمان بە بۆنەی ۲ ی ڕێبەندان ۷۷ تەمین ساڵڕۆژی دامەزرانی كۆماری جوانەمەرگی كوردستان.
بڕوخێ‌ ڕژیمی دیكتاتۆری ئاخوندی
سەركەوێ‌ خەباتی گەلانی ئێران
سازمانی خەبات ی كوردستانی ئێران
كومیتەی ناوەندی
یەكی ڕێبەندانی ۱٤۰۱ كۆچی خۆری