بەپێی هەواڵی گەیشتوو، ئەمرۆ سێ شەممە 14ی خەرمانانی 1396، خەڵكی قارەمانی شاری بانە بە ناڕەزایەتی لەمەر كوشتنی دوو كۆڵبەری ئەو شارە لەلایەن هێزە سەركوتگەرەكانی رژیم، بە دەم بانگەوازی چالاكانی مەدەنی و سیاسی ئەو شارەوە چوون و مانگرتنی گشتی لەو شارە بەرێوەچوو.

بەپێی راپۆرتەكان هەتا سەعات 13:00 بەگشتی دووكان و بازاری شار داخراوە و دوكاندار و بازاری لەبەردەم فەرمانداری رژیم لەو شارە ناڕەزایەتیان بەرێوەبردووە.

سەرچاوەكان باس لەوە دەكەن هێزە داگیركەرەكانی رژیم بەجێی جێبەجێ كردنی داوای خەڵكی بانە بۆ بە سزاگەیاندنی فەرماندر و بكەرانی ئەو تاوانەی دوێنێ‌، هێزێكی زۆریان بۆ سەركوتی نارەزایەتی جەماوەر هێناوەتە سەر شەقامەكان و لە هەندێ شوێندا خەڵكی قارەمانی شاری بانە بەرەوروویان بوونەتەوەو تا ئامادە كردنی ئەم هەواڵە چەند لاوێكی خۆراگر و چاونەترسی شاری بانە بریندار بوون. زانیاری ئەوە گەیشتووە كە لە تێكهەڵچوونەكانی ئەو شارە دوو كەس لە هێزەكانی رژیم بریندار كرابوون.

 
ڕێکه‌وت: 2017-09-05 10:56:04
به‌شی ( هه‌واڵی کوردستان )