کەمپینێک دژ بە بێڕیزی کردن بە جلوبەرگی کوردی رێکخرا

بەڕێوەبەرانی ئەو کەمپینە دەڵێن: ئەوەی لە بەرنامەی کولا قرمزی" کاناڵی ٢ی تەلەڤیزیۆنی حکوومەتی ئێرانی سەبارەت بە بێڕێزیکردن بە جلوبەرگی واڵا و ڕەنگینی ژنانی کورد بڵاو کرایەوە،‌ جێگای قبووڵکردن نییە و خەڵکی کوردستان و بەتایبەتی ژنانی کورد بە هیچ شێوەیەک ئەو بێڕێزییە قبووڵ ناکەن و دەبێ هەڵوێستی خۆیان دەرببڕن.

هەروەها بەڕێوەبەرانی ئەو کەمپینە دەڵێن: "جلوبەرگی کوردی ناسنامەی نەتەوەی کوردە و مێژووی چەندین هەزار ساڵەی هەیە و یەکێک لە پێناسەکانی ئەم گەلەیە و بۆ پاراستنی ئەم ڕەسەنایەتییە دەریایەک خوێنی باشترین ڕۆڵە بەشــــــەرەفەکانی ئەم گەلە لە پێناویدا ڕژاوە.