قۆناغی نوێی خەبات، کۆتایی سیستەمێکی دواکەوتوو دیکتاتۆر لە ئێران!

عەلی بارامی

رژیمی دەسەلاتدار لە ئێران کە لە سەر بنەمای بیری دواکەوتووانەی پۆلێک ئاخوند دامەزراوەو ماوەی 38 ساڵە بە هەموو شێوەیەک خەڵکی ئێران دەچەوسێننەوە و داهات و سەرمایەی خەڵکی هەژار و سەرکوتکراوی ئێران بۆ کاری ئاژاوەگێڕی و خزمەتی بیر و هزری دواکەوتووانەی خۆیان لە ناوچەکە و پەرەپێدانی تاقم و دەستە و گروپی ترۆریستی جۆراوجۆر خەرج دەکەن. لە دوای هەموو تاقیکردنەوەیەک و هەموو جۆرە پیلانێک بۆ بە لارێدابردنی کۆمەڵگەی نێودەوڵەتی و راگشتی لە ئێران، ئیتر وەک دەبینین "خەنەیان رەنگی نەماوە" و خەڵکی ئێران و ناوچەکەو جیهانیش لەوە تێگەیشتوون کە تێکڕای پێکهاتەی ئەو نیزامە پێویستە کۆتایی پێ بێ و نەتەوەکانی ئێران بە ماف و ئازادیەکانیان بگەن و حکومەتێک لەو وەلاتە دەسەلاتی هەبێ کە شیاوی جەماوەر و ئەو شارستانیەتە بێ کە لەلایەن نەتەوەکانەوە بە چاوی رێزەوە سەیری دەکرێ.

ئەگەر چی لە ماوەی نزیک بە 4 دەیە دەسەڵاتی ئاخوندان، بزوتنەوەی شۆرشگێڕانە لە ئێران و کوردستان لێبراوانە لە مەیداندا بووەو بەردەوام بووە لە قوربانی دان و بۆ بردنە پێشەوەی خەباتی رەوا و ئازادیخوازانە دژ بەو دەسەڵاتە دواکەوتوو و تێکدەر و تیرۆریست پەرەوە ساتێ نەوەستاوە، بەڵام ساڵی 2017 کۆمەڵێک پێشهاتی نوێ رووی دا کە نەک هەر لە راستای بەرژەوەندیەکانی رژێمدا نەبوون بەڵکوو راست دژایەتیان لەگەڵ سیاسەت و بەرنامە و بوونی رژێمدا هەیە.

ساز بوونی هاوپەیمانیەکی ناوچەیی بە سەرۆکایەتی عەرەبستان بۆ بەرەوروو بوونەوە لەگەڵ هێژموونی و چالاکی تێکدەرانەی رژێم لە ناوچەی خۆرهەڵاتی ناوەراست. کە کاریگەریەکانی ئەم هاوپەیمانیە لە یەمەن و سوریە دەرکەوت. دواییش وەک یەکەم هەنگاوی ئاشکرا و روون گەمارۆی سیاسی و ئابووری خستە سەر وەڵاتی قەتەری دۆستی نزیکی رژێم.

گۆران لە دەسەڵاتی ئەمریکا و هاتنی دۆناڵد ترامپ کە بە پێچەوانەی حکومەتی ئوباما نەیارێکی سەرسەختی رژێمی ئێرانە و کابینەکەشی پێکهاتووە لەو کەسانەی جیددین لە بەرەوروو بوونەوەی رژێم لە ناوچەکە و لەوە زیاتریش وەک رێکس تیلرسۆن وەزیری دەرەوەی ئەمریکاش ئیشارەی پێدا ئەمریکا کار بۆ رووخانی رژێمی ئێران دەکات.

گرتنی کونفرانسی عەرەبی، ئیسلامی ئەمریکایی لە ریاز بە بەشداری سەرۆک کۆماری ئەمریکا و ژمارەیەکی زۆر لە وەلاتانی عەرەبی ئیسلامی  و بریاردان لە سەر بەرەورووبوونەوەی تیرۆریزم و بەتایبەتیش رژێمی ئێران و پێکهێنانی ناوەندێک بۆ لێدانی سەرچاوە داراییەکانی تیرۆریستان.

لەوانەش گرینگتر کۆبوونەوەی ئێرانیان ئازادیخواز لە پاریس کە لەلایەن شۆرای ملی مقاومەتەوە لەژێر ناوی "ئێرانی ئازاد" رێکخراو تیایدا ژمارەیەکی زۆر لە کەسایەتی سیاسی و ئەندام پارڵمان لە هەر پێنج قارەکەی جیهان بەشداریان کرد و لە پەیامەکانیاندا بەروونی ئیشارەیان بە پێویستی روخانی رژێمی ئێران و بە فەرمی ناسینی شۆرای ملی مقاومەت کە تەنیا ئاڵترناتیوی رژیمە و داوایان لە حکومەتەکان کرد پشتیوانی لە شۆرای ملی مقاومەتی ئێران و رێکخراوی موجاهیدینی خەڵکی ئێران بکەن.

ئەگەر چی پێشتر هەست بە ئاڵوگۆر لە سیاسەتی وەڵاتانی ناوچە و جیهان لە حاست رژێم دەکرا، بەڵام  کۆبوونەوەی بەرینی پاریس لە 10ی پووشپەردا، خالی وەرچەرخان و دڵنیاکەرەوە بوو کە سیستەمی سیاسی لە ئێران دەبێ بگۆرێ و بۆ ئەم ئاڵووگۆرانەیش بزوتنەوەی ئازادیخوازی و خەڵکی نارازی و چەوساوەی ئێران دەوری ئەساسی و سەرکیان لە ئەستۆ دەبێ. هاوکات سازمانی خەبات وەک هێزێکی خاوەن پێگە لە بزوتنەوەی مافخوازانەی کوردستانی ئێران و وەک بەشێک لە بزوتنەوەی شۆرشگێڕانە و ئازادیخوازانەی ئێران لەو کربوونەوە بەرینەدا چالاکانە بەشداری کرد و سکرتێری گشتی روانگەی سازمانی خەباتی لەپێوەند بە رژێمی ئێران و داهاتووی ئەو وەڵاتە خستەروو.

هەروەها مریمی رەجەوی سەرۆک کۆماری هەڵبژێردراوی شۆرای ملی مقاومەتی ئێران، لە پەیامی تایبەتی خۆی دا وێرای باس کردن لە دۆخی خەڵک و کێشەی نێوباڵەکانی رژێم و قەیرانە ئابووری کۆمەلایەتیەکان، ئیشارەی بە چەندین خاڵ وەک چارەسەری کێشەی ئێران کرد، وەک:

تاکە چارەسەر روخانی رژیمی ویلایەتی فەقیهە، کە کاریگەرترین هێز بۆ ئەو مەبەستە راپەرینی جەماوەری، بوونی هێزێکی گۆرانخواز و دیموکراتیک وەک جێگرەوەی رژێمی دەبێ، کە ئەو هێزە خاوەن بەرنامە و وەڵامە بۆ پرکردنەوەی درزە سیاسی و کۆمەلایەتیەکانی کە لە ئێراندا دروست بوون وەک باوەری نەگۆر بە دەنگی خەڵک و هەڵبژاردنی ئازاد، جیایی دین و دەوڵەت، بەشداری چالاکانەی ژنان لە رێبەری کردنی کۆمەڵگە، پشتیوانی لە مافی خودموختاری بۆ نەتەوەکانی ئێران. 

هەروەها وەک هەنگاوی یەکەم لەو پێوەندەدا مریەمی رەجەوی پێشنیارەکانی خۆی خستەروو کە بریتی بوون لە: مقاومەتی خەڵکی ئێران بۆ روخانی ئیستبدادی مەزهەبی لە ئێران بە رەسمی بناسن. رژێمی ئێران لە رێکخراوی نەتەوە یەکگرتووەکان و رێکخراوی هاوکاری ئیسلامی دەرکەن و شوێنەکەی بدەن بە مقاومەتی خەڵکی ئێران.

سپای پاسداران بخەنە لیستی تاقمە تیرۆریستیەکان و لە تێکرای ناوچەکەی وەدەر نێن.

خامنەیی و باقی دەسەڵاتدارانی رژێم بەهۆی پێشێلکردنی مافی مرۆڤ و تاوان دژ بە مرۆڤایەتی بەتایبەت کوشتاری ساڵی 67 و تاوانی جەنگی لە ناوچەکە راکێشنە بەردەم عەداڵەت.

وەک باس کرا، چەندین هۆی دەرەکی نێوخۆیی بەتایبەت پەرەسەندنی قەیرانەکان لە کۆمەڵگەی ئێران و نارەزایەتی تێکرای چین و تووێژەکان و بوونی بزوتنەوەیەکی بە بەرنامە و خاوەن پشتێوان لە کۆمەڵگەی نێونەتەوەیی، سەرتایەکە بۆ دەستپێکی خەباتێکی یەکانگیر و کاریگەر بۆ لەناوبردنی دەسەڵاتی دیکتاتۆر و گەندەڵ و لاواز و گۆشەگیر کراوی ئێران، لە ناوچەکە و جیهان.