بەرنامەی نوێی ئامریکا لە پێوەند بە رژیمی ئێران

رۆژی سێ شەممە 21ی خەرمانانی 1396 هەواڵدەری رۆیتەر هەواڵی دا: بەپێی وتەی شەش بەرپرسی ئێستا و پێشووی ئەمریکا، سەرۆک کۆمار دۆناڵد ترامپ خەریکی لێکدانەوەی بەرنامەیەکە کە دەتوانێ‌ هەنگازی هێبرانەتر دژ بە هێزەکانی رژیمی ئێران، دەستوپێوەندەکانی شیعەی ئەو رژیمە لە عێراق و سوریە و پشتیوانیەکانی لە تاقمە توندئاژۆکان دیاری دەکات.

ئەو سەرچاوانە وتیان ئەو پێشنیارە لەلایەن جیمز مەتیس وەزیری دیفاعی ئەمریکا، رێکس تیلرسۆن وەزیری دەرەوە، ژنراڵ مەک مستر راوێژکاری ئاسایشی نەتەوەیی کۆشکی سپی  و باقی بەرپرسانی پلەبەرزی ئەو وەلاتە ئامادە کراوەو رۆژی هەینی لە کۆبوونەوەی ئەنجومەنی ئاسایشی نەتەوەیی پێشکەشی ترامپ کراوە.

دوو کەس لەو بەرپرسانە وتوویانە ئەو پێشنیارە ئەگەری زۆرە رێکەوتنی لەسەر بکرێ و تا کۆتایی سێپتامبر راگەیەندرێ. بەپێی سەرچاوە جیاجیاکان، ئامانج لەو پێشنیارە زیادکردنی فشارەکان بۆ سەر رژیمی تاران و کۆنترۆڵ کردنی بەرنامەی موشەکی بالستیک و پشتیوانی لە توندئاژۆییە.

بەرپرسێکی دیکەی حکومەت گوتی ئەو پێشنیارە خوازیاری بەرنامەیەکی بەربڵاو بۆ بەرەنگاربوونەوە لەگەڵ چالاکی خراپکارانەی رژیمی ئێران، سەرچاوەی دارایی و پوڵی، پشتیوانی لە تیرۆر، نانەوەی بشێوی لە ناوچەکە بەتایبەت لە سوریە  و عێراق و یەمەنە.