ناوی ژمارەیەک لە گیراوانی شارەکانی کوردستان لەلایەن هێزەکانی رژیمەوە

 بەپێی هەوالەکان، دوابەدوای سەرکەوتنی ریفراندۆمی هەرێمی کوردستانی عێراق و شکستی سیاسەتەکانی رژیمی ئێران دژ بەو گشتپرسیە، خەڵکی شارەکانی کوردستانی رۆژهەلات رژانە شەقامەکان و شایی و خۆشیان دەربری.

هێزەکانی رژیم لە دوای ئەوەی نەیانتوانی بەربە ئاهەنگ و خۆشی جەماوەر بگرن، کەوتنە پیلانگێڕان و فیلمیان لەو کەسانە هەڵگرتووە کە لە ئاهەنگەکاندا بوون لە رۆژانی دوایی دا بانگهێشتی ئیدارەی بەدناوی ئیتلاعاتیان کردوون، یان ئەوەی کە چوونەتە سەر ماڵەکانیان و دەستبەسەریان کردوون.

ئەگەر چی لە سەرەتاوە ناونیشان و ژمارەی گیراوەکان روون نەبوو بەڵام هەتا دێ و ناونیشان و ژمارەی گیراوەکان بۆ هەواڵدەریەکان و خەڵک زیاتر ئاشکرا دەبێ.

بەپێی هەواڵ تەنیا لە شاری سەقز کە ئاهەنگ و خۆشی بە گەرمی تیایدا بەرێوەچوو، رێژەیەکی زۆری خەڵک دەستبەسەر کراون کە هەندێ هەواڵدەری باس لە گیرانی 280 کەس دەکەن کە لەلایەن هێزەکانی رژیمەوە دەستبەسەر کراون.

هەروەها ناوی سێ کەس لە گیراوانی کامیاران ئاشکرا بووە کە بەو شێوەیە: 

لایەق رەحمانی، فەرەیدوون کەریمی و یاسر فەرەجوڵاهی.

هەواڵدەری هەنگاو ئاشکرای کرد لە شاری سنەیش زیاتر لە 10 کەس دەستبەسەر کراون کە ناوی سێ کەس لەو گیراوانە ئاشکرا بووە کە بریتین لە: موسلیم سەعید پوور، محەمەد مینبەر و پەیمان مینبەری.