راپەرینی مەزنی جەماوەری ئێران دژ بە رژیمی گەندەڵی حاکم بەردەوامە

رۆژانی 10 و 11ی بەفرانباری 1396 لە زۆربەی شارەکانی ئێران راپەرینی مەزنی جەماوەریی دژ بە رژیمی گەندەڵی ئاخوندان بە بەشداری هەزاران کەس بەرێوەچوو.

نارەزایەتی و راپەرین لە دەیان شار لەوانە: مەشهەد، ئیسفەهان، تاران، تەورێز، کرماشان، سنە، بانە، کاشان، لاهیجان، ئیزە، مەلایر، توسرکان، قهدەریجان، بوشێهر، هومایونشار، کەرەج، مەسجد سلێمان، نەهاوەند، بەندەرعەباس، رەشت، قوم، شاهین شار، گورگان، عەمەدان، ئیلام، زەنجان، شاری رەزا، ماەشهر، تاکستان، شادگان، قەزوین، خورەم ئاوا، کەنگاوەر، نەجەف ئاوا، نورئاباد و چەندین شار و ناوچەی دیکە بەرێوەچوو.

لە دوو رۆژی رابردوودا هێزە سەرکوتگەرەکان ژمارەیەکیان لە جەماوەری راپەریو دەستبەسەر کردووە، هەروەها بەهۆی دەستڕێژی ئەو هێزانە دەیان کەس کوژراو و بریندار بوون.

بەپێی هەواڵەکان ئامادەکاری دەکرێ بۆ راپەرین لە رۆژی شەشەمدا لە هەموو شارەکانی ئێران.

لەلایەکی دیکەو هەر لەو بارەوە هەواڵەکان باس لەوە دەکەن لە شارەکانی کوردستانیش بە هەمانشێوە ئامادەکاری بۆ راپەرینی جەماوەری دەکرێ و لە شارەکانی سنە و بانە و کرماشان و ئیلام نارەزایەتی بەرچاو بەرێوەچووە. لە ترسی بەرینتر بوونی نارەزایەتی جەماوەر رژیمی ئێران شارەکانی کوردستانی زیاتر لە رابردوو میلیتاریزە کردووە.