سازمانی خه‌بات ی
کوردستانی
ئێران
ماوەی نزیک بە دوو مانگە شاری جزیرەی کوردستانی ترکیا لە لایەن حکوومەتی ئەو وەلاتەوە گەمارۆی خراوەتە سەرو رێوشوێنێکی نیزامی توند بەسەر کەشی شاردا زاڵەو لە ماوەی دوو مانگدا زیاتر لە 700 هاوەڵاتی کورد بوونەتە قوربانی وتەنیا لە چەند رۆژی رابردوو لە هێرشیکی درندانەدا نزیک بە 60 کەس کە لە ژێر زەمینی خانوێکدا گیریان خواردبوو لە هێرشیکی درندانەدا شەهید کران، جێگەی ئاماژەیە لەناو ئەو کەسانەدا 2 منداڵی تەمەن 13 ساڵ بوونی هەبووە.
ماوەی دوو مانگە جەنگ لە دژی دانیشتوانی ئەو شارە درێژەی هەیە و هیچ ناوەند و وەڵاتێک لە بەرانبەر ئەو ستەمگەریەدا نەهاتۆتە دەنگ و حکومەتی ترکیای ناچار بە کۆتایی هێنان بەو رەوشە نەکردووە.
جێگەی سەرسوورمانە لە سەدەی بیست و یەک و پاش چەندها ساڵ دەسەڵاتدارانی زاڵ بە سەر بەشەکانی کوردستان هێشتاش وابیر دەکەنەوە کە مێتۆدی سەرکوت و کوشتار دەتوانێ کۆتایی بە ویست و داوا رەواکانی گەلی کورد بێنێ و خەڵکی کوردستان لە راست ماف و خواستە رەواکانیان بێدەنگ بکات.
بێگومان چەندەی رێژەی ئەو سەرکووت و جینایتانە پەل و پۆ بهاوێژێ و پەرە بستێنێ رقی پیرۆزی گەلی کورد زیاتر و قایمتر دەبێ و گەلەکەمان مکۆرتر دەکات لەسەر بەرخودان و هەوڵێ زیاتر بۆ گەیشتن بە ماف و داواکانی کە هەمووی لە جارنامەی گەردوونی مافەکانی مرۆڤ جێ دەگرن و خواستی ئینسانی و دیموکراتیکن.
سازمانی خەبات ی کوردستانی ئێران وێرای مەحکوم کردنی ئەو هێرشانەو گەمارۆی سەر شاری جزیرە و سەر گەلی کورد لە کوردستانی ترکیا داوا لە رێکخراوە مرۆڤدۆست و وەڵاتانی لاگیری دیموکراسی و بە تایبەتی رێکخراوی نەتەوە یەکگرتووەکان دەکات لە حاند ئەو جینایەتانە بێدەنگ نەبن و سنوورێک بۆ کوشتنی خەڵکی بێ تاوان و سڤیلی کورد لە کوردستانی ترکیا دابنێن.
سلاو لە رۆحی شەهیدان و هیوادارین بریندارەکان بە زوویی چاک ببنەوە .
سازمانی خەبات ی کوردستانی ئێران
کومیتەی ناوەندی
20ی رێبەندانی 1394
