سازمانی خه‌بات ی
کوردستانی
ئێران
بەبۆنەی حەوتەمین ساڵرۆژی دامەزرانی رێکخراوی لاوانی خەباتی کوردستانی ئێران دەستەی بەرێوەبەریی ئەو رێکخراوە لە راگەیەندراوێکدا وێڕای باس کردن لە چۆنیەتی و هۆکانی
بەبۆنەی حەوتەمین ساڵرۆژی دامەزرانی رێکخراوی لاوانی خەباتی کوردستانی ئێران دەستەی بەرێوەبەریی ئەو رێکخراوە لە راگەیەندراوێکدا وێڕای باس کردن لە چۆنیەتی و هۆکانی هاتنەمەیدانی رێکخراوەکەیان تیشک دەخاتەسەر رۆڵ و نەقشی لاوان لە بزوتنەوەی رزگاریخوازی کوردستان و سازمانی خەبات.
دەقی راگەیەندراوی رێکخراوی لاوانی خەباتی کوردستانی ئێران بەبۆنەی حەوتەمین ساڵرۆژی دامەزرانی ئەو رێکخراوە:
لاوانی خوێن گەرم و نیشتمانپەروەر!
ئەندامان و دۆستانی رێکخراوی لاوانی خەباتی کوردستانی ئێران!
بەبۆنەی حەوتەمین ساڵرۆژی دامەزراندنی رێکخراوی لاوانی خەباتەوە گەرمترین پیرۆزبایتان پێشکەش دەکەین و هیوادارین ساڵی داهاتوو بە ئازادی و لە نیشتمانی شیریندا ئەم یادە بەرز راگرین.
توێژی لاوان لە کۆمەڵگەی کوردستانی داگیرکراو بە درێژایی 40 ساڵ بەردەوام لە خەبات و بەرخۆداندا بووەو بە هەموو شێوەیەک دژ بە سیاسەت و بەرنامەی دژمنکارانەی رژیم وەستاوەتەوە، هاوکات ئەم توێژە گرینگ و کاریگەرە بەشێکی زۆر لە قورسایی ئەرکی شۆرش و خۆراگری کوردستان بۆ رزگاری و ئازادی یەکجاری لە ئەستۆ بووەو ئەوانەش وایان کردووە هەمیشە نوکی پەیکانی دژمنان ڕوو لە لاوان بێ و هەوڵی بە لارێدا بردن و فەوتانی لەلایەن رژیمی دیکتاتۆر و گەندەڵی ئاخوندان لە ئێران بدرێ.
بە هەستکردن بە مەترسی پیلان و پێشێلکارییەکانی ئەو رژیمە دەرهەق بە لاوانی کورد و فشاری زۆر و بەردەوامی دامودەزگا سەرکوتگەرەکانی، لە 11ی بانەمەری 1390 بە پلانی ژیرانەو پشتیوانی سەرکردایەتی سازمان و هەوڵ و تێکۆشانی لاوانی چالاکی ریزەکانی سازمانی خەبات و ناوخۆ و دەرەوەی کوردستان بەبیرکردنەوە لە رەوشی نالەباری لاوانی نێوخۆی نیشتمان و بەپەرۆشی بۆ پاڵپشتی و گرنگی رۆڵی ئەوان لە خەبات و بەربەرەکانێ دژ بە دەسەڵاتی دیکتاتۆری ئێران ریکخراوی لاوانی خەباتی کوردستانی ئێران دامەزراو پێی نایە مەیدانی تێکۆشان.
جێگەی باسە کە لاوانی خوێنگەرم و شۆڕشگێری کوردستان بەردەوام دژ بە زوڵم و زۆر وەستاونەتەوە و خەباتی خۆیان لە ریزی هێزە تێکۆشەر و شۆرشگێرەکان درێژەپێداوە یاخود رۆژانە و بەچەندین شێوەی جیاواز لە ناوخۆی وڵات چالاکی جۆراوجۆر ئەنجام دەدەن و بە بەردەوامی هەوڵی بردنە پێشی ئاستی هۆشیاری کۆمەڵگا دەدەن و بە کورتی لاوان هێز و داینەمۆی پێشخستنی کۆمەڵگەن.
رێکخراوی لاوان لە ماوەی حەوت ساڵ تەمەنی خۆیدا هەنگاوی بەرچاو و باشی بۆ بەرەوپێشبردنی خەباتی لاوان لە کوردستانی ئێران هەڵگرتووە و بە بەشداری چالاکانە لە چەندین کۆنفرانس و بەستنی چەندین کۆر و سیمیناری جیاواز و کاریگەر هەوڵی خستنە بەرچاوی کێشەی لاوان و بەرنامەی بۆ دۆزینەوەی چارەسەری گونجاوی بۆ کێشەکانیان داوە.
بوونی رێکخراوی لاوان کاریگەری ئەرێنی و باشی لەسەر لاوانی ریزەکانی سازمانی خەبات هەبووە و ئەوەش هیوای زیاترمان دەداتێ کە ئەندامانی چالاکی ریزەکانی رێکخراوی لاوان بە جیدیەتەوە درێژە بە کار و چالاکی خۆیان و هەوڵی دەستەبەرکردنی دەستکەوتی زیاتر دەدەن.
دیسان بەبۆنەی 11ی بانەمەڕ حەوتەمین ساڵرۆژی دامەزرانی رێکخراوی لاوانی خەباتی کوردستان پیرۆزبایی خۆمان پێشکەش بە تێکرای لاوانی تێکۆشەری ریزی رێکخراوەکەمان و سەرجەم لاوانی ئازادیخوازی گەلەکەمان دەکەینەوە.
رێکخراوی لاوانی خەباتی کوردستانی ئێران
دەستەی بەرێوەبەری
11ی بانەمەری 1397
