سازمانی خه‌بات ی
کوردستانی
ئێران
بە داخەوە لە کۆن تا ئێستا چ لە ناوخۆی ئێران و چ لە دەرەوەی ئێران، لایەنی سیاسی و کەسانی ئەوتۆ هەن کە خۆیان و چارەنووسیان بەستۆتەوە بە رژیمی ئاخوندی
سیامەند
بە داخەوە لە کۆن تا ئێستا چ لە ناوخۆی ئێران و چ لە دەرەوەی ئێران، لایەنی سیاسی و کەسانی ئەوتۆ هەن کە خۆیان و چارەنووسیان بەستۆتەوە بە رژیمی ئاخوندی ئێران و هەرکام بە جۆرێک فەلسەفەی سەقەت بۆ خۆبەستنەوەیان بە رژیم دەهێننەوە.
ئاشکرایە خۆبەستنەوە بە رژیمێکی سەرکوتگەر بە هەر بیانۆێک و لە ژێر هەر ناوێک هیچ ڕەواییەکی نیەو پشت کردنە لە جەماوەرو چارەنووسی. کاتێک دەسەڵاتێک و حکومەتێک هەموو سنوورو پێوەرە ئەخلاقی و مرۆفایەتیەکانی نەپاراستوەو رەحم و بەزەیی تەنانەت بۆ ئەو کەسانەی دەوروبەری خۆی نەبوە، کە بە جۆرێک رەخنەیان لێ گرتوە، چۆن دەکرێ بەبیانوی بێ بنەما، متمانە بە دەسەڵاتی لەوشێوە بکرێ و پشتی پێ ببەسترێ.
ئاخوندەکان لە ئێران، لە ماوەی نزیک بە چل ساڵ دەسەڵاتیان، بوونە هۆی وێرانی، تێک چوونی پێوەندیە کۆمەڵایەتیەکان،گرانی،بێکاری،داڕمانی ئابووری ئێران،هەژاریو لە هەموو بەرچاوتر، بوونە هۆی لە ناوبردنی هەموو بنەماکانی دیموکراسی و ماف وئازادیەکان و قورسترین وبێ بەزەییانەترین جۆری سەرکوت لەبەرانبەر خەڵکی ئێران بەکاردێنن کە بە پێ ئامارەکان و ئەو زانیاریانە تەنانەت لە راگەیاندنەکانی دەسەڵات و لە زمان بەرپرسانیەوە بڵاودەبێتەوە، ئەوە ئاشکرا دەکات کە هەلومەرجی ژیانی خەڵک لە رابردوو خراپترەو ڕادەی سەرکوت زیاتر پەرەی سەندوە.
بەفیڕۆدانی سەرمایەی خەڵکی ئێران بۆ دەستەو تاقمە ترۆریستیەکان و بە کوشت دانی سەدان کەس لە شەڕی سوریە، دەست تێوەردان لە ووڵاتانی ناوچەکەو هێرش بۆ سەرناوەندە مەدەنی و دیموکراسیەکان لە ووڵاتانی ناوچەی خۆرهەڵاتی ناوەڕاست،پێوەندی و ئاڵۆزی و بڵۆکبەندی سیاسی لە گەڵ ووڵاتانی روسیەو چین بە مەبەستی دەربازبوون لە ژێر فشارەکانی ئەمریکا کە هەمووی بە تێ چووی سیاسی و ئابووری زۆر بۆ خەڵکی ئێران تەواو دەبێ کە ئاکامی ئەو بلۆکبەندی و سات و سەودا سیاسیە، دۆڕانی ئیستراتیژیکی بۆ رژیم لێ دەکەوێتەوە، دۆران لەو شێوەیە کە روسیە داوای لە ڕژیم کرد هێزەکانی لە سوریە بەرێتە دەرەوە ئەویش لە دوای ئەو گشتە کۆژراو خەسارەتە ماددی و ئابووریە. ئەو شکستە یەک لە دوای یەکانە لە سیاسەتی خارجی رژیم تەنیا لایەنی ئیستراتیژیەکەی شکستی ئاخوندان و دەسەڵاتە شڕەکەیان دەگرێتەوە، دەنا بەشی زۆی لە داهاتی و سەرمایەی خەڵکی ستەم لێکراوی ئێرانەو خەڵکی ئێران دەگرێتەوە.
لە گەڵ ئەو گشتە خراپەکاریەی رژیم لە ووڵاتانی ناوچەکەو ئەو هەموو ماڵوێرانیەی بۆ خەڵکی ئێرانیان هێناوە، وەک لە سەرەتادا ئاماژەم پێکرد، سەرکوتی خەڵک بە تێکڕاو لاوان بە تایبەت بە توندترین شێوەو لە هەموو رۆژ و مانگ و ساڵەکانی تەمەنی ئەم دەسەڵاتە ملهوڕە، پێناسەیەکی سەرەتاییە لە بوونی حاکمیەت و دەسەڵاتێکی دیکتاتۆرو مرۆف کوژ کە خەبات و تێکۆشان دەکاتە ئەمری واقع و ئەرکێکی پیرۆز.
ئەو پێناسە کورتە بۆ دەسەڵات لە ئێران دەبوو زۆر لە مێژە هەموانی بێنایە سەر ئەو بۆچوون و باوەڕەی کە خۆ دڵخۆش کردن بە ریفۆرم و ئاڵوگۆر لە حاکمیەتی خۆسەپێنی دەسەڵاتدار،بە قازانجی جەماوەر نەلە ڕابردوو نە لەئێستاو وە نە لە داهاتودا نایەتە دیی.
ئەو دەسەڵاتە بە پشت بەستن بە هێزی سەرکوت وتۆقاندن و بە هەرزان فرۆش کردنی سەرمایەی خەڵکی ئێران و هەروەها بە مەعامەلەو سات وسەودا لە گەڵ ووڵاتانی خاوەن هێزی جیهانی توانیویە لە دەسەڵات بەردەوام بێ کە لە ئێستادا خەریکە بەشی زۆری ئەو سەهۆڵانە لە پێوەندیەکانی لە گەڵ ووڵاتانی خاوەن هێزی جیهانی لێ خاو دەبێتەوەو ئیتر خەریکە ئەستێرەی کزی دەسەڵاتی دیکتاتۆری ئاخوندی بە یەکجاری لە سیاسەتی جیهانیدا دەکوژێتەوە. لە حاڵەتێکی ئەو شێوەدا هەموو ئەوانەی تائێستاش دڵیان بەو رژیمە ستەمگەرە خۆشە باشتر وایە فریای خۆیان کەون وکارێک نەکەن ئەستێرەی ئەوانیش لە ئاسماندا بە یەکجاری وەکوژێ و تووش هەمان چارەنووس بن کە ئاخوندانی ملهوڕ تێی دەکەون.
