کۆمیتەی ئیمدادی ئیمام، هۆی پەرەپێدانی هەژاری!

خەباتمێدیا: ئایا سنووری کارەسات هەر ئەو مەودا پان و بەرینەی چینەکانی کۆمەڵگایە کە وەک دۆڵ و سیاچالێکی مەترسیدارە؟!

محەمەد کازمی ئەنبارلویی کە ئەندامی تاقمی مۆتەلەفەیە، 13ی خاکەلێوە لە بابەتیکدا کە لە هەواڵدەری تەنسیمی سەربەهێزی ترۆریستی قودس بڵاوی کردۆتەوە، لەو هەژاریە لە رادەبەرەی کە بە هۆی دزی و دەسبەرداگرتنی سەرمایەی نەتەوەیی سەرچاوەی گرتووە، دەڵێ و دەنووسێ: کامەیە سنووری کارەسات؟ سنووری کارەسات ئەو مەودا بەربڵاوەی نێوان چینەکانی کۆمەڵگایە کە وەک دۆڵ و سیاچاڵێکی مەترسیدار هەموو هەوڵە چاکسازیەکان قوت دەدا و رێگە نادا دوو هەنگاو بەرەو پێش بچین.

لە دەسەڵاتداریەتی ئیسبدادی مەزهەبی ویلایەتی فەقیە، دەکرێ لە رێگەی دروشمی پشتیوانی لە هەژاران، بە کۆشک و سەرمایەی ئەفسانەیی بگەی و هەژاری و برسیەتی چین و تووێژەکان پەرە پێ بدەی و دۆڵ و سیاچاڵێکی مەترسیدار ساز بکەی.

یەکێک لەوانەی ئەو سیاچاڵانە ساز دەکا، کۆمیتەی ئیمدادە  کە لە 14ی رەشەممەی 1357 دامەزراوە، وە هۆی دامەزرانی ئەو ناوەندە، بە رواڵەت پشتیوانی لە هەژار و برسیەکان و تێرکردنیانە.

بە پێی ئامارێکی کۆمیتەی ئیمداد لە مانگی سەرماوەزی 1392، کە لە هەواڵدەری ئیسنا 25ی جۆزەردانی 1394دا بڵاوکراوەتەوە، داهاتی کۆمیتەی ئیمدادی ئیمام لە رێگەی سنوقی سەدەقە ساڵی 91 نزیک بە 180 ملیارد تمەن بووە. هەروەها خەزەڵوەری 1393 کۆمیتەی ئیمام خومەینی رایگەیاند مانگانە زیاتر لە 21 ملیارد تمەن لە ئێراندا بە سەدەقە کۆدەکرێتەوە. 

ئەو ناوەندە دزەی رژێم دەیهەوێ لە کەرەستە نوێکانیش بۆ پڕ کردنی سنوقەکان کەڵک وەرگرێ. پەروەیزی فەتاح یەکێکی دیکە لە مۆرەکانی باندی فاشیستی مۆتەلەفە و سەرۆکی کۆمیتەی بەناو ئیمداد 24ی خەزەڵوەری 1394 بە هەواڵدەری حکومەتی فارسی گوتووە: پوڵی سنوقەکانی سەدەقە ئێستا بە شێوەی دەستی کۆدەکرێتەوە، ئەوە لە حاڵێکدا ئێمە لە سنوقی زۆرمان لە ماڵەکان، رێگەوبان و ئیدارەکاندا هەیەو بۆ کۆکردنەوەی پوڵەکان کاتێک و نەفەری زۆری دەوێ، بۆ چارەسەری ئەوە دەبێ کەڵک لە بەرنامەی ئینترنێت و تەلەفون وەرگرین.

لە هەمانکاتدا ئەو ناوەندە دڵسۆزە! چەندین کێشە داوێنی گرتووە. لەو بارەوە عەلیرەزا عەسگەریان جێگری کۆمیتە (هەواڵدەری حکومەتی فارس 24ی خەزەڵوەری 1394) ئیشارەی بە کێشەی دارایی و ئیداری ئەو ناوەندە کردوە و دەڵێ: کەمی هێز، کورتهێنانی سەرچاوە، دابەش نەکردنی عادڵانەی پووڵ، دابین نەکردنی سەرچاوەی وامەکان، گرینگی نەدان بە دەسەڵات و کەم و کوڕی و بێ توانایی ئەو خاڵانەن کە بەرەوروومان بۆتەوە. 

و ئێستا با گۆشەیەک لە خزمەتگوزاریەکانی ئەو ناوەندەی کە داشداری هەژارانە ببینین!

مەسەلەی هاوردەکردنی ماشینی پۆرشە بۆ کۆمیتەی ئیمداد

هاوردە کردنی 27 هەزار ماشینی لۆکس لەلایەن کۆمیتەی ئیمدادەوە، هەنگاوێکی سەرسووڕ هێنەر کە لە نێو هاتوهاواری پووڵە پیسەکاندا ون کرا.

رۆژنامەی شەرق 25ی جۆزەردانی 1394 نووسی: عەبدولرەزا رەحمانی فەزلی وەزیری ناوخۆ ماوەیەک لەوە پێش کە لە مەجلیسدا ئامادە بوو لە بارەی پووڵە پیسەکانی هەڵوێستی بگرێ. کە لە بەشێک لە قسەکانیدا هاوردەکردنی بی ئێم و پۆرشەی هێنایە پێش و وتی: لە کۆمیتەی ئیمداد زیاتر لە 100 کەس، 27 ماشێنی لۆکسیان هێناوەتە وەڵاتەوە کە بەداخەوە سو ئیستیفادەیان لە مافی هەژاران کرد. قسەگەلێک کە دوایی بێ دەنگی رەد کردنەوەی بە دوای خۆیدا هێنا.

ئەحمەدی ئەمیرئابادی، نوێنەری قوم بە تانە لە وەزیری ناوخۆ، دەڵێ: ئاغای وەزیر دەیویست برۆ چاک کا، بڵام چاویشی کوێر کرد. ئەو لە مەجلیس مەسەلەیەکی باس کە کۆمیتەی ئیمداد ژمارەیەک ماشینی لۆکسی وەک بی ئێم و پۆرشەی هاوردە کردوە کە ئەو وتانەی وەزیر بووە هۆی بێ باوەڕی خەڵک بەو ناوەندە ئینقلابیە کە یادگاری ئیمامە.

کۆشک نشینانی کۆمیتەی ئیمداد چۆن بە دادی کۆخ نشینان دەگەن؟

کۆمیتەی ئیمدادی خومەینی لە کاتێکدا سەدان ملیارد دولار داهاتی هەیە، بەناوی سەدەقە تەنیا مانگی 30 بۆ 50 هەزار تمەن هاوکاری هەژاران دەکا کە هیچ دەردیاکیان دەوا ناکا. بەڵام بۆ بەرێوەبەران و سەرۆکەکانی ئەو ناوەندە دزە  لە هیچێک دەست ناگێڕێتەوەو هەموو شتێکیان بۆ دابین دەکرێ.