بەرێوەچوونی گردبونەوەیەکی جەماوەری لەشاری ستۆکهۆڵم دژبە پەلاماری تورکیە بۆسەر رۆژئاوا

کوردانی نیشتەجێی سویید رێپێوان و گردبوونەوەیەکی جەماوەریان دژ بە هێرشی هێزەکانی تورکیە بۆ سەر کوردستانی رۆژئاوا بەرێوەبرد.
رۆژی شەممە 20ی رەزبەری 1398ی هەتاوی، کوردانی نیشتەجێی وەڵاتی سویید لە ستۆکهۆڵمی پێتەخت بە بەشداری هەزاران کەس، هێرشی هێزە جینایەتکارەکانی حکومەتی ئۆردوغانیان بۆ سەر کوردستانی رۆژئاوا بە توندی مەحکوم کرد.
لەو گردبوونەوە جەماوەریەدا کوردانی نیشتمانپەروەری سویید بە دانی دروشم و خوێندنەوەی پەیام پشتیوانی خۆیان بۆ خەڵکی زۆرلێکراوی کوردستانی رۆژئاوا راگەیاند و پەلامار و جینایەتەکانی دەسەڵاتی تورکیەیان بە توندی مەحکوم کرد و داوایان لە حکومەتی سویید کرد پشتیوانی لە خەڵکی کورد لە رۆژئاوا بکەن و چاوپۆشی لە جینایەتەکانی ئوردوغان و دارودەستەکەی نەکەن.
شایانی باسە ژمارەیەک لە ئەندامان و دۆستانی سازمانی خەبات لە وەڵاتی سویید بە شێوەیەکی چالاکانە بەشداری ئەو رێپێوان و چالاکیە بوون و بە هەست و سۆزەوە پشتیوانیان لە براکانیان لە کوردستانی رۆژئاوا کرد.