برینداربوونی چەند کۆڵبەر لە سنورەکانی پیرانشار و خۆی و سەوڵاوە

 لە ماوەی ڕۆژانی ڕابردوودا چەند کۆڵبەر و کاسبکار لە سنوری شارەکانی خۆی و سەوڵاوا و پیرانشار، بە تەقەی ڕاستەوخۆی هێزە چەکدارەکانی ئێران بریندار بوون.
ئێوارەی یەکشەممە ١٩ی خەزەڵوەر، هێزە چەکدارەکانی ئێران لە ناوچەی ئەلەندی شاری خۆی، تەقەیان لە کاروانی کۆڵبەران کردووە و کۆڵبەرێک بەناوی حەسەن تەمەن 24 ساڵ و خەڵکی ئاوایی توور، بە سەختی بریندار بووە.
ناوبراو لاق و دەستی بریندار بووە و لە ئێستادا لە ناوەندی دەرمانی خۆی لە ژێر چاوەدێری پزیشکیدایە.
لەلایەکی دیکەوە ڕۆژی سێ شەممە ٧ی خەزەڵور، هێزەکانی سپای پاسداران لە سنووری تەتەی سەوڵاوا تەقەیان لە کۆڵبەران کردووە و لە ئەنجامدا ٣ کۆڵبەر بەناوەکانی یادگار مەریوانی، دەروێش ساحێبی و عوسمان تەرخاناوا، بریندار بوون.
ئەو سێ کۆڵبەرە خەڵکی مەریوانن و لەکاتێکدا تەقەیان لێ کراوە کە هیچ جۆرە شت و مەکێکیان پێ نەبووە.
ئێوارەی ڕۆژی دووشەممەش ١٠ ی خەزەڵوەری ٢٧١٩، هیزە چەکدارەکانی ئێران لە سنووری پیرانشار و لە شوێنێک بە ناوی ”شاخە ڕووخاو“ تەقەیان لە کۆڵبەران کردووە و لانیکەم دوو کۆڵبەر بەناوەکانی سەعدەت نیا تەمەن 33 ساڵ و خەڵکی گەندی دڵاوان، سولەیمان ئابتین، 50 ساڵە و خەڵکی گوندی بادیناوێ‌، بریندار بوون.
ئەو دوو کۆڵبەرە بە مەبەستی چارەسەریی پزیشکی ڕەوانەی ناوەندە دەرمانییەکانی شاری چۆمان لە باشووری کوردستان کراون.