هێرشی موشه‌کی ڕژیم بۆ سه‌ر بنکه‌کانی ئه‌مریکا له‌ عێراق و هه‌رێمی کوردستان

خه‌‌‌باتمیدیا: شەوی چوارشەممە، ١٨ی بەفرانبار، ڕێژیمی ئێران لە هێرشێکی مووشەکیدا، چه‌‌‌ند بنکه‌‌‌یه‌‌‌کی سه‌‌‌ربازی هێزه‌‌‌کانی ئه‌‌‌مریکا و هاوپه‌‌‌یمانانی له‌‌‌ عێراق و هه‌‌‌رێمی کوردستان کرده‌‌‌ ئامانج. به‌‌‌پێی هه‌‌‌واڵه‌‌‌ سه‌‌‌ره‌‌‌تایه‌‌‌کان هەریەک لە بنکەی ئاسمانی "عەین ئەسەد"، کە دەکەوێتە پارێزگای ئەنبار لە رۆژئاوای عێراق و بنکەی سەربازی فرۆکەخانەی هەولێر لەهەرێمی کوردستان، کە لەوێشدا هێزەکانی هاوپەیمانی نێودەوڵەتی و هێزەکانی ئەمەریکای تێدایە کراونه‌‌‌ته‌‌‌ ئامانج.

پێنتاگۆن، وەزارەتی بەرگریی ئەمریکاش وێڕای پشتڕاستکردنەوەی ئەم هێرشە مووشەکییانەی کراونەتە سەر بنکەی “عەینولئەسەد” و بنکەیەکی نیزامیی دیکەیان لە نیزیک فڕۆکەخانەی هەولێر لە باشووری کوردستان، ڕایگەیاندوە کە خەریکی بەراوردی زیان و خەسارەکانی ئەم هێرشانەن. پێنتاگۆن هەروەها ڕایگەیاندوە کە دۆناڵد تڕامپ لە کۆشکی سپی لەگەڵ بەرپرسانی ئەمنیەتی و سەربازیی وڵاتەکەی لە گفتوگۆی به‌‌‌رده‌‌‌وام دایه‌‌‌ بۆ به‌‌‌رپه‌‌‌رچدانه‌‌‌وه‌‌‌ی ئه‌‌‌مریکا دژ به‌‌‌و هێرشه‌‌‌ ترسنۆکانه‌‌‌ی ڕژیم.

میدیاکانی سه‌‌‌ر به‌‌‌ ڕژیم باس له‌‌‌وه‌‌‌ ده‌‌‌که‌‌‌ن، کە لە هێرشەکەدا میلیشیا چەکدارییە عێراقییەکانی سەر بە ئێرانیش بەشداری پرۆسەی بەئامانجگرتنی بنکەی سەربازی عەین ئەسەد بوون، بێئەوەی بەفەرمی ناوی ئەو میلیشیایانە بهێنرێت .

بەپێی بەیاننامەیەکی وەزارەتی بەرگری ئەمەریکا، ئێران ١٢ موشەکی بە دوو بنکەکەدا ناوە ، هەروەها تۆڕی "فۆکس نیوز" ئاماژەی بۆ ئەوە کردووە، کە ژمارەی موشەکەکان ١٥ مووشەک بوون. سەبارەت بە زیانە گیانییەکان راپرتەکان دەستبەجێ ئاماژەیان بەوە کردووە، کە لە هێرشەکەدا هیچ زیانێکی گیانی نەبووە .