سازمانی خه‌بات ی
کوردستانی
ئێران
رۆژى هەینى رێکەوتى 27/5/2016 بە مەبەستى رێکخستن و کاراکردنى کاروبار، کومیتەى قەلادزێى سازمانى خەبات کۆبوونەوەى ساڵانەى خۆى گرێدا. کۆبوونەوەکە بەبەشدارى ئەندامان و لایەنگرانى سازمانى خەبات لەناوچەى قەلادزێ و لە ژێر سەرپەرشتى بەرێز کاک رێبوار حسێنى بەرپرسی پێوەندییە کوردستانیەکانى سازمانى خەبات بەرێوە چوو.
لەو کۆبوونەوەیە دا کە هاوکات نوێنةرى هەر دوو رێکخراوى ئافرەتان و لاوانى خەبات بەشدار بوون سەرەتا بە دەقیقەیێک بێدەنگى بۆ روحى پاکى شەهید رەحمان پوورکریم نوێترین شەهیدى رێگەى رزگاری و پێشمەرگەى چاونەترسی سازمانى خەبات و سەرجەم شەهیدانى سازمانى خەبات و کوردستان دەستى پێکرد. پاشان هەر بەو بۆنەوە بەرێز کاک رێبوار حسێنى سەرەتاى قسەکانى بە باسێک لەسەر شەهید رەحمان و چوونیەتى رووداوى شەهید بوونى و کەسایەتى ئەو شەهیدە بە نرخە کردەوە و لەپاشانیش لەسەر ئەرک و مافى ئەندامان لەم قۆناغەى ئێستاى جوڵانەوەى رزگاریخوازانەى گەلەکەمان دوا و بە لەبەرچاو گرتنى دۆخى هەستیارى ناوچەکە و ئێران و کوردستان هەوڵ و هێممەتى زیاترى ئەندامانى سازمانى خەبات ى بە زامنى پێش کەوتن و بەرەوپێش چوونى کارەکانى تەشکیلات زانى.
لەدرێژەى کۆبوونەوەى ساڵانەى کومیتەى قەلادزێ لە پاش ووتەکانى بەرێز کاک رێبوار حسێنى بەرپرسی پێشووى کومیتە چەند قسەیێکى بۆ ئامادەبووان کرد و هەر کام لە ئەندامانى کاراى کومیتەش پێشنیار و رەخنە و تێبینیەکانیان باس کرد.
لەپاش باسێکى گەرم لەسەر چونیەتى کاروبارى کومیتە لە ماوەى ساڵى رابردوو دەست کرا بە هەڵبژاردنەوەى کومیتەى بەرێوەبەرى نوێى قەلادزێ و لە رێگەى دەنگى نەهێنى بەرپرسی نوێى کومیتە هەڵبژێردرا و هاوکات نوێنەرلە هەرکام لە رێکخراوەکانى ئافرەتان و لاوانیش دیارى کرا.
بەرێز بەرپرسی پێوەندییە کوردستانیەکان لە کۆتایی کۆبوونەوەکە وێراى دەست خۆشی و ماندوونەبوونى بە بەرێوەبەرانى پێشووى کومیتە، پێرۆزبایی لە بەرپرس و بەرێوەبەرانى هەڵبژێردراو بۆ ساڵى داهاتوو کرد و رێنوینى و راسپاردەى پێویستى لەگەڵ بەرێوەبەرانى نوێ هێنایە ئارا و کۆبوونەوەکە لە کەشێکى تەندورست و بە سەرکەوتوویی کۆتایی بە کارەکانى هێنا. 
