یادی سەروەران

سەروەری گەل شەهید عارف خزمەت گوزار
ئەو شۆڕە لاوانە کە گوڵی تەمەنیان بە دەست ڕەشەبای داگیرکەران هەڵ وەرا، ئەو قارەمانانە کە گیانیان لە پێناو خزمەت بە گەلەکەیاندا بەخت کرد، ئەو ڕۆڵە کوردانەی کە لە گیانیان بووردن و لە مافی ڕەوای گەلەکەیان نەبووردن ناوی پاک و پیرۆزیان بۆ هەمیشە لە مێژووی پڕ لە حەماسەو قارەمانەتی گەلی کورد دا دەمێنێتەوە و یادیان بۆ هەمیشە لە دڵی دانەدانەی گەلەکەمان دا تۆمار دەکرێ. ئەو گیان بەرزانەی کە لە پێناو مافی گەلی کورد دا بەخت کران ئەو خوێنە ئاڵ و گەشانەی کە بە دەستی نگریسی داگیرکەرانی ئەم ئاو و خاکە، ڕژانە سەر عەرز بۆ ساتێکیش لە بیر شەرافەتمەندانی گەلەکەمان ناچێتەوە و یاد و بیرەوەریان شەو چەلەی مەجلیسانە و دڵی مردوان گەرم دادێنێ و هەناوی خائینان و خۆفرۆشان دا ئەخات...
ئەو دەستە پیسانەی کە لە شەهیدکرانی پارێزەرانی شەرەف و کەرامەتی گەلەکەماندا بەشداریان کردوە بە دەستی بە هێزی ڕێبوارانی ڕێگای شەهیدان قرتاون و تۆڵەی خوێنی بە ناحەق ڕژاوی شەهیدان لە دڵی دانەدانەی خەڵکی بە شەرەفی گەلەکەمان دا بلێسە دەستێنێت و ئاگرەکەی لە گیانی دوژمنانی گەل بەر دەبێت. هەر چەند شەهید کران و کەوتنە سەر عەرز، تەرمی پیرۆزی هەر قارەمانێکی مەیدانی خەبات و تێکۆشان داخ وکەسەرێکی گەورەیە لە سەر دڵی گەل وهەڤاڵانی، هەر لەو کاتەدا گڕوتین بە دڵی شۆڕشگێڕان دەدات و بە ڕژانی خوێنی هەر شەهیدێک حەقانییەتی زیاتری کورد و دوژمنایەتی لە بن نەهاتووی دوژمنانی گەل بۆ هەموو کەس ڕوون دەکاتەوە. لاوانی بە ئەمەگ و فیداکاری کورد کە بە دڵ و گیان هەست بە زوڵم و زۆری داگیرکەران دەکەن و تامی تاڵی چەوسانەوەیان چێشتووە، بەو پەڕی لە خۆبوردوویی ودێنە ڕیزی شۆڕشەوە و لەو پێناوەدا لە هیچ چەشنە فیداکاریێک درێغی ناکەن. یادی سەروەرانی گەلەکەمان وەک یەکێک لە یادگارە بە نرخەکانی شۆڕشی ڕەوای گەلی کورد، گڕ و تین بە دڵی شۆڕشگێڕان دەبەخشێت و مێژووی پڕ لە حەماسەی ئەو گەلەی پێ دەنەخشێنێت. بەڵێ ڕۆڵە قارەمانەکانی کوردستان کە لەو پەڕی هەژاری و بێ دەرەتانی لە ژێر باری ستەمی چەند قاتی داگیرکەراندا ماهییەتی دوژمنانی گەلەکەمانیان بۆ دەرکەوتووە، هەر چەشنە ڕەنج و نارەحەتیەک لە پێناو ئامانجەکانی شۆڕشدا قەبووڵ دەکەن و بە بێ دوودڵی دێنە ڕیزەکانی شۆڕشەوە و بۆ بەرەو پێش بردنی ئامانجەکانی گەل تا سەرحەدی گیان بەخشین دەڕۆن و بەو پەڕی سەخاوەتەوە گیانی پیرۆزیان پێشکەش بە بارەگای گەل دەکەن و دەچنە کاروانی شەهیدانی سوور خەڵاتی گەلەوە و بە خوێنی خۆیان سەنەدی حەقانییەتی شۆڕشی گەلی کورد مۆڕ دەکەن. یەکێک لە ڕۆڵە قارەمانەکانی گەلەکەمان کە لە پێناوی ئامانجەکانی شۆڕشی کوردستاندا گیانی بەخشی، شەهید عارف خزمەتگوزار ناسراو بە عارف مەولانەیە. 
شەهید عارف خزمەتگوزار کوڕی مەولان لە ساڵی 1339 ی هەتاویدا لە ئاوایی (دەرەتفێ) مەریوان لە بنەماڵەیەکی هەژار و بێ دەرەتانی ئەم کوردستانە چاوی بەدنیا هەڵێنا. شەهید عارف لە بەر هەژاری و بێ دەرەتانی بنەماڵەکەی نەیتوانی بچێتە مەدرەسە و ئەویش بە ڕیزی هەزاران لاوی بێ سەودای ئەم کوردستانە زیاد بوو. شەهید عارف کە لە بنەماڵەیەکی جوتێر و هەژار بوو بە یارمەتیدانی بنەماڵەکەی لە کاروباری وەرزدا هەر لە منداڵییەوە و لە تەمەنی 8 ساڵیدا لە کاتێکدا کە هێشتا کرچ و کاڵ بوو قۆلی بۆ کارکردن هەڵماڵی و دەستی بە کارو کاسبی کرد. شەهید عارف هەر لە منداڵییەوە تاڵی چەوساندنەوەی چێشتبوو چونکە لە سایەی داگیرکەرانەوە هەر لە منداڵییەوە بۆ پەیداکردنی بژێوی بنەماڵەکەی سەرەڕای کاری وەرزێری لەگەڵ براکانی مەجبوور بوو بۆ شارە فارس نشینەکانی ئێران بچێت. دوای ڕوخانی ڕژێمی شایەتی و هاتنە سەرکاری ڕژێمی ئاخوندان و هەڵایسانی شۆڕشی کوردستان شەهید عارف خزمەتگوزاریش هەر وەک باقی ڕۆڵەکانی کوردستان عیزەتی بزووت و خۆی پێڕانەگیراو لە پاییزی 1360 دا هاتە ڕیزی شۆڕشی کوردستانەوەو ئەوەی لە توانای دابوو بۆ ئەرکی شۆڕش بە کاری دەهێناو درێغی نەدەکرد. عارف کورێکی قسەخۆش و لە بەردڵان بوو بە دەنگە خۆشەکەی زۆر جار مەجلیسی گەرم دادێنا. پاش ماوەیەک نێردرایە زیندانی مەرکەزی سازمان و بە جوانی ئەرکەکانی بەجێ گەیاند. لە بەهاری ساڵی 1368دا نەقڵی مەڵبەندی 1ی سازمان کرا و لەو مەڵبەندەشدا وەک پێشمەرگەیەکی ئازاو فیداکار مەئمووریەتەکانی بە جێ دەگەیاند بە جۆرێک کە لە جەولەی سیاسی نیزامی پێشمەرگەکانی ئەو مەڵبەندە لەو ساڵەدا لە ناوچەی مەریوان دەوری باشی گێڕاو لە زۆربەی شەڕەکانی ئەو ساڵەدا واتە 1368 ئازایانە بەشداری کرد. بە داخێکی گرانەوە لە شەوی 20 لە سەر 21/ جۆزەردان/1369 دا لە کاتی بە جێ هێنانی مەئموورییەتی سازمانی دا مینێکی دوژمن لە پشت ئاوایی ( نیروان)ی ناوچەی بانە لە ژێر پێی دا تەقیەوە و لەگەڵ هەڤاڵێکی قارەمانی دیکەی شەهید بوون و گیانی پیرۆزیان بۆ بەهەشتی شەهیدان فڕ٠ی و بە جووت چوونە کاروانی شەهیدانی کوردستان. 
هەزاران سڵاو لە گیانی پاکی شەهید عارف و هاوڵانی