سازمانى خەبات هێرش بۆ سەر رووداو مەحکووم دەکات

 

رۆژى شەممە 25/6/2016 هێرشیکى ترۆریستى کرایە سەر بنکەی سەرەکى تۆری میدیایی روداو لە شارى هەولێر کە بەداخەوە چەندین کارمەند بریندار بوون و زیانی مادیشى لێکەوتەوە. 

تۆرى میدیایی روداو بە هۆى کارى پرۆڤیشناڵى میدیایی و پیشەیی بوون و پاراستنى بنەماکانى کارى راگەیاندنى ئازاد و بێ  لایەن توانیویەتى جێگەى خۆى بکاتەوە و جێى دەستى لەکارى راگەیاندن دیارە.  

پێویستە ئەو هێرشە بە توندترین شێوە مەحکووم بکرێت و بە پاڵپشتى تێکرایی  ئازادى رادەربرین و کاری میدیا و راگەیاندن زیاتر لە کوردستان پەرە پێ بدرێ.

کومیسیۆنى راگەیاندنى سازمانى خەبات هاوخەمى و هاودەردى خۆى لەگەڵ سەرجەم کارمەندان و بەرێوەبەرانى تۆرى میدیایی رووداو دەردەبڕێ و هیوادارە بریندارەکان بە زووترین کات تەندورستیان بۆ بگەرێتەوە و لە هەمان کاتیشدا وێراى شەرمەزار کردنى ئەو کردەوە قێزەوەنە  کە زیاتر لە کارى بەکرێگیراوانى رژیمى ئێران دەچێ، هیوادارە کاریگەری سلبی نەخریتە سەر رەوتى کارەکانى روداو بەڵکو زیاتر لە جاران لەسەر خزمەتەکانیان بە بوارى میدیا و راگەیاندن بەردەوام بن. 

سازمانى خەبات ى کوردستانى ئێران

کومیسیۆنى راگەیاندن  

25/6/2016