سازمانی خه‌بات ی
کوردستانی
ئێران
پێشەکی بە بۆنەی حەفتاو پێنجەمین ساڵڕۆژی کۆماری کوردستان کە بە ڕێبەرایەتی پێشەوا قازی محەممەد دامەزرا
جەماوەری ستەملێکراوی کورد!
خەباتکارانی ڕێگەی ئازادی!
پێشمەرگە قارەمانەکانی کوردستان و کەس و کاری شەهیدان!
پێشەکی بە بۆنەی حەفتاو پێنجەمین ساڵڕۆژی کۆماری کوردستان کە بە ڕێبەرایەتی پێشەوا قازی محەممەد دامەزرا، پیرۆزبایی بە خوشک و برایانی کورد، خەباتکارانی ڕێگەی ئازادی، پێشمەرگە قارەمانەکان و تێکۆشەرانی خەباتکار و زیندانیانی سیاسی کە لە زیندانەکانی ڕژیمی ملهوڕی ئاخوندی کەوتونە بەر شکەنجەی جەستەیی و دەرونی، پێشکەش دەکەم. کۆماری کوردستان لە مێژووی خەباتی ڕزگاریخوازی و مافخوازی خەڵکی کوردستاندا، روناکی رۆژانی رەش و دەستکەوتێکی گەورەیە،کۆماری کوردستان ئاسۆی ڕوونی خەباتی ڕەوای خەڵکی کورستان ورەو باوەڕ بە خۆ بوون و هێمای نەسرەتن و هەستانەوەیە.
کۆماری کوردستان نیشاندەری زیندوویی دانیشتوانی کوردستان بە تێکڕای نەتەوەو زمان و دین وباوەڕەکانە. دامەزرانی کۆماری کوردستان لەو سەردەمەدا بە دروشمی پێکەوە حەوانەوە لە گەڵ تێکڕای خەڵکی ئێران، ئەو ڕاستیەی سەلماند کە کورد ئامانجی بە دەست هێنانی مافە ڕەواکانیەتی لە چوارچێوەی ئێران و هیچ کات نەیویستوە ببێتە هەڕەشەو مەترسی، بەڵام حکومەتی دیکتاتۆری حەمەڕەزا شا لە جیات سەلماندنی مافەڕەواکانی گەلی کورد لە ئێراندا،بە کێشە دروست کردن و هێرش بۆ سەر شارەکانی کوردستان و دەسەڵاتی کۆماری کوردستان، درێژەی بە جینایەتکاریی و پەیڕەو کردنی سیاسەتی دیکتاتۆری و هەوڵ بۆ فەوتانی گەلی کورد دا. لە کاتێکدا کە کۆماری کوردستان لە ماوەی نزیک بە یەک ساڵ تەمەنیدا بووە نمونەی پێکەوە حەوانەوەو ئاشتی و تەبایی لە نێوان چین و تۆێژەکانی کوردەواری و نەتەوەو باوەڕەکانی کوردستان.
سیاسەتە دژمنکارانەی حکومەتی حەمەڕەزا شا بۆ هەمیشە وەک خاڵێکی ڕەش بە سەر مێژووی دەسەلاتە دیکتاتۆرەکەی خانەوادەی پەهلەوی دەمێنێتەوە. ڕژیمی ملهوڕی ئاخوندی کە میراتگری ستەمگەری و جینایەتکاریی ڕژیمی شایە،لە ماوەی چل و دوو ساڵی دەسەڵاتیدا دڕندانەتر لە حکومەتی حەمەڕەزا دانیشتوانی کوردستان و تێکڕای خەڵکی ئێرانی خستۆتە ژێر ستەم و چەوسانەوە،بەڵام سەرەڕای ستەمگەری دەسەڵاتی ئاخوندەکان، تێکۆشان و چالاکی هاونیشتمانیانی کورد بەردەوامەو ستەم و ئیعدام نەیتوانیوە ببێتە هۆی پاشگەزبونەوەی دانیشتوانی کوردستان لە خەبات بۆ گەیشتن بە مافەڕەواکانیان و لە خەبات بۆ ڕوخانی ئەو ڕژیمە دیکتاتۆرو ستەمگەرە.
لە ساڵیادی دامەزرانی کۆماری کوردستان، داواکارم کە خاڵە ئەرێنی و بەکەڵکەکانی کۆمار بکرێنە سەرچاوە بۆ کارەکان و لە خاڵە لاوازەکانی بۆ کارو تێکۆشانمان بخەینە بەرچاو هەوڵ بدەین لە سەر بنەمای دروشمی گونجاو بە کردەوە هەنگاو هەڵگرین و درێژە بە تێکۆشان نیشتمانی و نەتەوەیی بدەین. بە بۆنەی ئەم یادە پیرۆزە داوا لە هێزیە سیاسیەکانی کوردستانی ئێران دەکەم لە چوارچێوەی پلاتفۆرم و پڕۆژەێکی هەمەچەشنە کە دەستەبەری ئامانجە سەرەکیەکانی هەمووان بێ،پێکەوە لە پێناو وەدی هاتنی ویستەکانی دانیشتوانی کوردستان و ئامانجی شەهیدانی سوورخەڵاتی شۆڕشی مافخوازانە بۆ لە ناوچوون و ڕوخانی ڕژیمی دیکتاتۆری ئاخوندی تێ بکۆشین.
بڕوخێ ڕژیمی دیکتاتۆری ئاخوندی ئێران
سەرکەوێ خەباتی ڕەوای میللەتی کورد
لە گەڵ پیرۆزبایی دووبارەم
سازمانی خەبات ی کوردستانی ئێران سکرتێری گشتی
بابەشێخ حوسەینی
٢ی ڕێبەندانی ١٣٩٩ کۆچی خۆری
