ڕاگەیاندراوی کومیتەی ناوەندی سازمانی خەبات سەبارەت بە ڕۆژی نێونەتەوەیی زمانی دایک

زمانی هەر نەتەوە و گەلێک سەرەڕای ئەوەی کە یەکێک لە کەرەستە و ئامرازەکانی پێوەندی نێوان تاکەکانە لەگەڵ یەکتر و لێک حاڵی بوون لە کار و ئەرکی ڕۆژانە لە بوارەکانی، ئابوری و بازرگانی، فەرهەنگی و کۆمەڵایەتی و دەربڕینی داخوازیەکانیان و خۆ ناساندن و دەربڕینی شادی و شین، ناسنامە و کەرامەت و پێناسەی کەسایەتی تاک و ڕەمزی بوونی نەتەوەیە. یەکێک لە هێماکانی نەتەوەیی و جیاکردنەوەی نەتەوەکان لە یەکتری، بێجگە لە نیشتمان و کلتور و داب و نەریتە نەتەوایەتیەکان، زمانی دایکی نەتەوەکانە.
پاراستن، پەرەپێدان و بەرەوپێش بردنی زمان و کلتوری نەتەوایەتی هەر گەلێک، نیشانەی پێشکەوتن و بەرەوپێش چوونی ئەونەتەوەیەیە لە بوارەکانی: فەرهەنگی، ئابووری، سیاسی، کۆمەڵایەتی و بە بێ گەشەو پاراستنی زمان، نەتەوەکان بەرەو لاوازی و بێ دەرەتانی و ژێردەستەیی و چاو لەدەستی و لە ئاکام دا بەرەو فەوتان و لە ناو چوون دەڕۆن.
گەلی ئێمە گەلی کورد لە کوردستانی پان و بەرین دا، سەرەڕای دابەشکراوی و نیشتمان داگیرکراوی لە بواری نەتەوایەتی، نیشتمانی، ئابووری، فەرهەنگیەوە، لە هەرکام لە پارچە داگیرکراوەکانی کوردستان دا، زمان و داب و نەریت و فەرهەنگی نەتەوایەتیشی یاساغ کراوە و هەر کام لە رژیمە دیکتاتۆرەکانی کوردستان لە قۆناغ و سەردەمە جۆراو جۆرەکاندا بە جۆرێک و بە پیلان و گەڵاڵەی دژمنانە، سەرەڕای نکۆلی کردن لە ماف و ئازادیە نەتەوایەتی و نیشتمانیەکانمان، لە هەوڵی فەوتان و لە ناوبردنی زمانەکەماندا بوون. بەڵام گەلی ئێمە لە هەموو سەردەم و قۆناغەکانی خەباتی نەتەوایەتی بۆ ڕزگاری نەتەوەیی و گەیشتن بە بەختەوەری، پاراستن و پەرەپێدانی زمانی شیرینی کوردی، بە یەکێک لە بنەما و ئەرکە نەتەوایەتیەکانی زانیوە و لەم بوارەدا، رووناکبیران و زمانوانانی دڵسۆزی زمان و کلتور و فەرهەنگی نەتەوایەتیمان، سەرەڕای گیرو گرفت و کۆسپ و لەمپەرەکانی سەر ڕێ، زمانەکەمانیان لە لاواز بوون و فەوتان پاراستووە و ئەو ناسنامە نەتەوەییەمانیان نەوە لە دوای نەوە گەیاندۆتە قۆناغێک کە ئێستا بە خۆشحاڵیەوە هەر تاکێکی کورد لەم بارەوە خۆی بە بەرپرسیار و دەین دار دەزانێ و بە بێ سڵکردن لە تەنگ و چەڵەمەکان و بێ ترس لە هەڕەشە و تۆقاندنی دژمنانی داگیرکەری نیشتمان و زمان و فەرهەنگمان، هەرکام لە بەرخۆیەوە لە خەمی زمانی نەتەوەکەمان دان. لە ساڵیادی ڕۆژی نێونەتەوەیی زمانی دایک دا، وێڕای پیرۆزبایی گەرم بەم بۆنە پیرۆزەوە، داوا لە تێکڕای ڕووناکبیران، نووسەران، زمانزان و زمانوانان، هونەرمەندان بە هەموو بەشەکانی هونەرەوە، ڕاگەیاندکاران، شاعیران و تێکڕای دڵسۆزان دەکەین کە بەوپەڕی ئەمانەتەوە لە خەمی پاراستن و پەرەپێدانی زمانەکەمان دابین و نەهێڵین دژمنان بەپیلان و گەڵاڵەی نەویستانەیان لە ژێر هژمونی زمان و فەرهەنگی خۆیان دا زمان و کلتوری نەتەوایەتیمان بشێوێنن .
پیرۆزبێ رۆژی نێونەتەوەیی زمانی دایکی

کومیتەی ناوەندی سازمانی خەبات
3ی ڕەشەممەی 1399ی کۆچی خۆری