ڕێکەوتنامەی ڕژێم لەگەڵ چین بە ئامانجی دەربازبوون لە قەیرانی هەمەلایەنە

 شۆڕش حاجی
ڕێکەوتنامەی 25ساڵەی ڕژیمی ئێران لەگەڵ وڵاتی چین لە ڕۆژانی داهاتوو، جارێکیتر یادەوەری ڕێکەوتننامەی تورکەمەنچای لە بیروڕای گشتی زیندوو کردەوە و بۆ جارێکیتر خاکی ئێران لە ئاکامی سیاسەتە هەڵە و زیدەخوازییەکانی دەسەلاتدارانی ئاخوندی لە هەڕاج درا. هەر چەند تا ئێستا دەسەڵات لە بڵاو بوونەوەی ناوەڕۆکی ئەو ڕێکەوتننامەیە خۆ دەبوێرێ و باس لە وردەکارییەکانی ئەو خاک فرۆشیە ناکات، بەڵام ئەوەی لە زانیارییەکانی پێشوو دەرئەکەوێ، باس لە سەرمایەدانانی 400 ملیارد دۆلاری چین لە بەستێنە جۆراوجۆرەکانی کەرت و ژێرخانی ئابووری دەکات و لە بری ئەوەش بردنی نەوتی ئێران بە نرخێکی زۆر کەم و داشکێندراو. ڕوون و ئاشکرایە ئەو رێکەوتننامەیە لە ئاکامی درێژەدان بە سیاسەتە هەڵەکانی ئاخوندان و کەوتنە ناو گەمارۆی هەمەلایەنەی نێودەوڵەتی و وەدیهاتنی قەیرانی جیددی ئابووریی لە وەڵاتی ئیرانە و زێدەخوازیی و هەوڵەکانی ئاخوندەکان بۆ دەستراگەیشتن بە چەکی ناوکەیی کە بە زامنی مانەوەیان لەسەر حوکم دەزانن، وای کردووە ئاخوندان، لە، هیچ جۆرە شەرمەزاریی و جینایەت لە ڕاست گەلانی ئێران نەپرینگێنەوە. وەک دەبیندرێ لە دوایین هەوڵیشیاندا بۆ ماوەی 25ساڵ ئێرانیان ڕادەستی وەڵاتی چین کردووە و مەعلوم نییە پانتایی ئەوجنایەتە تا چ ئاستێکی تریش پەرە دەستێنێ. ڕژیمی ئێران بە خەیاڵی خۆیان، دەیانهەوێ وەک بەرپەرچدانەوەیەک بە سیاسەتی تەحریمی نێونەتەوەیی لەگەڵ وەڵاتی چین ڕێککەون و بە گومانی خۆیان فشارەکانی ڕۆژئاوا لەسەر خۆیان، ناهێلن و دەتوانن رووبەرووی جیهان ببنەوە و ئەسبی خۆیان لە بەستێنی ئەتومی تاو دەنێ و بەرەوپێش بتازێن. ئەو هەڵە موحاسەباتیەی ئاخوندان لەوانەیە وەرچەرخانی گەورە لە ڕەوتی ڕووبەرووبونەوەی جیهان لە ڕاست ئێران، دروست بکات. بۆ زانینی ئەو بابەتە پێویستە ئەسڵی کێشەکە روونبکریتەوە و بزانین ناوەرۆکی کێشەی ڕۆژئاوا و ئێران چیە ئێران؟ وەلاتێکی دیکتاتوری فاشیستیە کە،دەیهەوێ لە ڕێگەی چەکی، ناوکەیی پێگەی خۆی لە ئاستی ناوچە و جیهان پەرە پێبدا و قایم بکات و هاوکات هەڕەشەی سڕینەوەی وەڵاتان و بەرنامە شومەکانی بۆ هەناردەکردنی شۆڕشە قێزەونەکەی بۆ جیهان بکات. هەر بۆیە کۆمەڵگای جیهانی بە پشت بەستن بەو زانیارییانە ڕازی بە پەسەندکردنی ئێرانێکی ناوکەیی نابن و ڕێگە بە دەستڕاگەیشتنی چەکی، ناوکەیی نادەن. ڕژیمی ئاخوندی دەبێ بزانێ بۆ وەستاندنی ئەو بەرنامە شوومەی ڕۆژئاوا لە هەر ڕێگەیەک ئەگەر پڕ تێچووش بێ کەڵک وەردەگرێ و بۆیە دەسەلات، گەر بیر بکاتەوە کە لە ڕێگەی ئەو رێکەوتنامەیە دەتوانێ بەربەرەکانێی کۆمەڵگای جیهانی بکات و بە خەیاڵی خۆی درێژە بە پرۆسەی دەستراگەیشتن بە چەکی ئەتۆمی بدات، هەڵەیەکی گەورە ئەکات. لە بارودۆخێکی لەم چەشنە بژاردەکانی تری وەک هێرشی نیزامی دێنە گۆڕێ جا چ لە ئاستی نیونەتەوەیی دابێ یان هێرشی ئەمریکا و ئیسرائیل بێ. ئەگەرێکیتر ئەوەیە کە ڕژیم بۆ پڕبوونی دەستی لەسەر مێزی وتووێژ، ملی داوە بە ئەنجامدانی ئەو ڕێکەوتنە و وەک کارتێکی فشار بەکاری دێنێ. لە هەر هەڵ و مەرج و بەهەر ئامانجێک بێ زیانی قەرەبوونەکراوە لە خەڵکی ئێران بە گشتی ئەدرێ و لەوانەیە ئاسەوارە خراپەکانی بۆ چەندین نەوە بمێنیتەوە. ئەو بابەتە تەنیا ئەو ڕاستیە دەردەخات کە ڕژیم لە پێناو مانەوە و حوکمی ناڕەوای لە هیچ جۆرە جینایەت و کارەساتێک سڵ ناکاتەوە و ئەگەر پێویست بێ سات و سەودا لەسەر هەموو خاکی ئێران و گەلانی نیشتەجێی بکات لە پێناو مانەوەی دەسەلاتداریەکەی ئەوە بە بێ دوودڵی دەیکات. پێویستە چاوەرێبین لایەنەکانی ناوەرۆکی ئەو ڕێکەوتنە، لە ڕۆژانی داهاتوو زیاتر دەرکەوێ و ئاستی خەسارەتەکانی ئاشکرابێ. وەک قسەی کۆتایی ڕوون و ئاشکرایە چەندەی ئەو دەسەڵاتە لەسەر تەخت بمێنیتەوە قەبارەی زیان و خەسارەتەکان بەرفراونتر و گەورەتر ئەبێتەوە.