هۆشداری کرملین بە وڵاتانی ڕۆژئاوایی هاوکات لەگەڵ پەرەسەندنی ناکۆکییەکان لەگەڵ ڕوسیە

هاوکات لەگەڵ پەرەسەندنی ناکۆکی نێوان ڕوسیە و وڵاتانی ڕۆژئاوایی، کرملین، هۆشداری داوەتە ڕۆژئاواییەکان تا لە کردەوە نائاساییە بەربڵاوەکانیان لەدژی مسکۆ دەست هەڵگرن.
دیمیتری پسکۆف، وتەبێژی کرملین لە کاردانەوەدا بە ناکۆکییەکانی ئەم ماوەیە ودەرکردنی دەیان دیپلۆمات، وتی: ڕوسیە بەهیچ شێوەیەک دەستپێشخەری ئەم ناکۆکییانە نەبووە، و هۆشداری داوە کە مۆسکۆ بۆ کۆتایی پێهێنانی ئەم ناکۆکییانە قازانجەکانی خۆی ناکاتە قوربانی.
وەزارەتی دەرەوەی ئامریکا، ڕۆژی سێشەممە 20ی ئاپریل ڕایگەیاند کە نوێنەری خۆی لە مۆسکۆ، بەمەبەستی ڕاوێژ دەگەڕێنێتەوە بۆ واشنتۆن. پێشتر ڕوسیە پێشنیاری دابوو کە نوێنەری ئامریکا دەبێت ڕوسیە بەجێ بهێڵێت.
هاوکات وەزارەتی دەرەوەی ڕوسیە داوای لە دوو دیپلۆماتی بولغارستان کرد تا خاکی ڕووسیە بەجێ بێڵن.
لەماوە پێنج ڕۆژی ڕابردوودا دەیان دیپلۆماتی دیکە لە ئامریکاو کۆماری چیک و ڕۆمانی لە ڕوسیە دەرکراون.
هەروەها کۆماری چیک 18دیپلۆماتی ڕوسیەی دەرکردووە و داوای لە یەکیەتی ئورووپا کردووە بە نیشانەی هاوپەیمانی، دیپلۆماتەکانی ڕوسیە دەربکرێن.
پسکۆف، بە هەواڵنێران وتووە کە پێوەندی نێوان ڕوسیە و ڕۆژئاوا گەیشتۆتە نزمترین ئاستی خۆی و ئەم بارودۆخە لەئاکامی کردەوەی نەیارانە لەدژی مۆسکۆ ڕوویداوە.
وەزیری دەرەوەی ئۆکراین هۆشداری داوە ئەگەری ئەوە هەیە کە ڕوسیە پیلان بۆ دەستدرێژی وهێرش بۆسەر ئۆکراین دادەڕێژێ.
وەزیری دەرەوەی ئۆکراین داوای لەهاوپەیمانانی کرد بۆ پاشگەزکردنەوەی ویلادیمێر پوتین، هۆشداری بدەنە مۆسکۆ کە ئەم کردەوانە ئاکامی باشی نییە.
ڕوسیە دەڵێت بە دوای شەڕەوە نییە و لەمافی خۆی بۆ جێبەجێ کردنی هێزەکانی لە نێو خاکی خۆی بەهەر شێوەیەک کەپێی باش بێ دیفاع دەکات.