سازمانی خه‌بات ی
کوردستانی
ئێران
بەرێز بانکی مۆن، سکرتێری رێکخراوی نەتەوە یەکگرتوەکان!
بە پێویستی دەزانم بە ئاگاداریتان بگەێنم رژیمی دەسەڵاتدار لە ئێران بە شێوەییکی بەر‌بلاو دەستی داوەتە ئیعدامی لاوەکانی کورد و زیندانیانی عەقیدەتی و سیاسی. لە چەند رۆژی رابردوودا حوکمی ئیعدامی بۆ چەندین لاوی کورد بە تاوانی تەبلیغ بۆ مەزهەبی سوننی دەرکردوە، کە بە پێی زانیارییەکان سێ شەممە 2ی ئوت 36 کەس لە زیندانی رەجایی شار گوێزراوەنەوە بۆ شوێنێکی نادیار. لە بڵاوکراوەیەکدا مەحمود ئەمیری موقەدم، ووتە بێژی بە ناو رێکخراوی مافەکای مرۆڤ لە ئیران رایگەیاند: وەزارتی ئیتلاعات لە پێوەندی لە گەڵ کەس و کاری زیندانیانەکانی ئەهلی سوننەت داوای لێکردووون بۆ وەرگرتنەوەی تەرمی ئیعدام کراوان سەردانی پزیشکی قانونی کەهریزەک بکەن.
ئەو زیندانیانە لە کاتێک دا حوکمی ئیعدامیان بەسەر داسەپاوە کە تەنیا بە هوی پەیرەوی کردن لە مەزهەبی سووننە و چالاکی مەزهەبی دەستبەسەر کراون و پرۆسەی دادگایی کردنەکانیشیان بە شێوەی ناقانونی و بە بێ ئەوەی دەرفەتی هیچ داکۆکیەکیان پێ بدرێ و لە پشت دەرگا داخراوەکانەوە بەرێوەچووە.
ئیمە لە سازمانی خەبات ی کوردستانی ئێران، وێرای مەحکوم کردنی حوکمی ئیعدامی کەسانی بێ تاوان و بە هوی بیروباوەر و عەقیدە لە لایەن بێدادگاکانی رژیمی ئێران، داوا لە رێکخراوی نەتەوەیەکگرتوەکان و ناوەندە جیهانیەکانی پارێزەری مافی مرۆڤ و حکومەتە دیموکراتیکەکانی جیهان دەکەین لە گەڵ مەحکوم کردنی ئەو ئیعدامانە،بۆ کۆتایی هێنان بە ئیعدام لە ئێران و کۆتایی هێنان بە پێشێل کردنی سەرەتایی ترین مافەکانی مرۆڤ هەنگاوی بە پەلە و جیددی هەڵگرن.
سازمانی خەبات ی کوردستانی ئێران
بەرێوەبەریی گشتی
بابەشێخ حوسەینی
2 ی ئووتی 2016
