یادی سەروەران: شەهیدان جەعفەری حەسەن زادە و خوسرەو کەریمی

سەروەرانی گەل: شەهیدان جەعفەری حەسەن زادە و خوسرەو کەریمی
شەهیدان جەعفەری حەسەن زادەو خوسرەو کەریمی، ئەو لاوە قارەمانەن لە زستانی 1358دا هاتنە ناو ڕیزی سازمانی خەباتەوە. ئەو دوو ڕۆڵە بەنرخە لە دوو بنەماڵەی بەڕێز، لە ساڵی 1340 لە ناوچەی بۆکان لە دایک بوون. بە ئیمانێکی پتەو بە مافی ڕەوای گەلەکەمان ئەرکی خەبات و موبارەزەیان گرتە ئەستۆ و سەرشان و ئامادەی هەموو جۆرە فیداکاریەک بوون .ئەم دوو ڕۆڵە قارەمانە دوای ماوەیەک بارهێنان، هەر پێکەوەش چوونە هێزی شەهید سەید خەلیلەوە لە ناوچەی بانە، ئەم تێکۆشەرانە چاوەڕوانی ئەوەبوون کەلە کاتی خۆی دا لە ئەنجامی وەزیفەدا فیداکاری خۆیان لە ڕێی کورد و کوردستان دا دەرخەن، تا لە ڕۆژەکانی دوایی مانگی خاکەلێوەی 1360دا لە گەڵ شەهید شێخ حسین لە هێزی شەهید سەید خەلیل دا لە دەراوی دڕۆڵەی بانە لەسەر جادەی سەقز بانە چوونە سەر ڕێی قافڵەی دوژمن. پێشمەرگەکان لەگەڵ بەرکەوتنی قافڵە دا دایانە بەر ئاوری بێ ئەمانی چەکەکانیان، دوژمن کە درێژەی قافڵەی بە دوادا دەهات لە دووری جێگەی شەڕەکە هێزی دابەزاندبوو و بە پێڕۆ دەوری جێگەی شەڕەکەی گرتبوو، کاتێک کە پێشمەرگەکان لە کردەوەی دوژمن ئاگادار دەبن قارەمانانە لە دوای دوژمن خۆ ڕزگار دەکەن و دوای زیانی زۆر کە بە دوژمنیان گەیاند جێگەی شەڕەکە بە جێ دەهێڵن. شەهید جەعفەر و شەهید خوسرەو لە سەرەتای جەنگەکەوە کە دەبینن پێشمەرگە سەر کەوتوون بە مەبەستی ئاو خواردنەوە لە جێی شەڕەکە دوور دەکەونەوە، بەڵام ڕفیقەکان بەوە نازانن. لە کاتی هێرشی ناکاو و پشتی جەبهەی دوژمن بۆسەر پێشمەرگەکان ئەو دوو ڕۆڵە بەنرخە دەکەونە داوی دوژمنەوە و شەهید جەعفەر بە برینداری و شەهید خوسرەو بە دیل دەگیرێن. هەڤاڵەکان کە چاوەڕوانی گەیشتنی دوو ڕفیقەکەیان دەکەن، دوای ماوەیەک هەواڵی بەدیل گیرانیان پێ دەگا و چارەیێکیان پێ ناکرێ. دوو ڕۆڵەی بەنرخی سازمانی خەبات، دوای نزیکی پێنج مانگ لە پادگانی بانەدا لە ڕۆژی 21ی خەرمانانی 1360لە بانە بەشێوەیەکی نامەردانە و دژی ئینسانی ئیعدام دەکرین وتەرمی پیرۆزیان لە لایەن کەس و کاریانەوە وەردەگیرێتەوە و لە گۆڕستانی بۆکان دەچنەوە باوەشی نیشتمانی خۆشەویست.
هەزاران سلاو لە گیانی پاکی شەهید جەعفەر و شەهید خوسرەو و هەموو هەڤاڵانیان..