سازمانی خه‌باتی کوردستانی ئێران کوشتنی مەهسا (ژینا) ئەمینی بە توندی مەحکوم دەکا

هاونیشتمانیانی داخداری کوردستان!

بنه‌‌‌ماڵه‌‌‌ی ژینای جوانه‌‌‌مه‌‌‌رگ!

به‌‌‌داخه‌‌‌وه‌‌‌ رۆژی سێ شەممە ٢٢ی خەرمانانی ١٤٠ ١ی هەتاوی، جارێکی تر یه‌‌‌کێک له‌‌‌ ڕۆڵه‌‌‌ خێر لەخۆ نەدیوەکانی گه‌‌‌له‌‌‌که‌‌‌مان، به‌‌‌ناوی ژینا ئەمینی ته‌‌‌مه‌‌‌ن ٢٢ ساڵ و خەڵکی شاری سەقز به‌‌‌بیانووی بێ حیجابی که‌‌‌وته‌‌‌ بەر پەلامار و هێرشی هێزە سەرکوتگەرەکانی "گەشتی ئیرشاد" و رەوانەی یەکێک لە بنکەکانی ئەو هێزە داپڵۆسێنەرە دەکرێ و دەکەوێتەبەر شکەنجە و لێدان و بە هۆی ئەو شکەنجانەوە تووشی مەرگی مەغزی دەبێ و دەگوازرێتەوە بۆ نەخۆشخانەی کەسرا لە تاران. مخابن لە دوای سێ رۆژ مانەوەی لە نەخۆشخانە، دوانیوەرۆی رۆژی هەینی ٢٥ی خەرمانان گیان دەسپێرێ‌ و دەچێتە ریزی قوربانیانی شکەنجە کراو بە دەستی هێزەکانی رژیمی ئاخوندی رەش و نگریس و دژی ئینسانی و دژی ئافرەتان.

رژیمی ئاخوندی ئێران دواکەوتوو دژە ئافرەتە کە بە درێژایی تەمەنی خۆی بەردەوام هەوڵی داوە بە بیانووی جیاجیا ژنان و ئافرەتانی کورد و ئێرانی بچەوسێنێتەوە و ماف و ئازادیەکانیان زەوت بکات. ئەو دەسەڵاتە دیکتاتۆرە بە مەبەستی سەرکوتی ئافرەتان دەیان ناوەندی سەرکوتگەری بە ناوی جیاجیا دامەزراندووەو تا بە خەیاڵی خۆی کۆمەڵگە تووشی چەقبەستوویی و مەترسی و داخران بکات.

سازمانی خەباتی کوردستانی ئێران داوا لە تێکڕای چین و تووێژەکانی کۆمەڵگەی کوردستان و ئازادیخوازانی ئێرانی و بەتایبەت ئافرەتانی شورشگێڕ دەکات لە بەرامبەر جیاوازی دانان و سیاسەتی نادادپەروەری و دواکەوتوویی رژیمی ئاخوندی، ناڕه‌‌‌زایی ده‌‌‌ربڕن و شێلگیرانەتر و بە بڕشتر بێنە مەیدان و خەباتی یەکانگیری ژنان و باقی چین و توێژەکانی ئێران و کوردستان. پێویستە هەمووان بە دژی نیزامی نه‌‌‌گریسی ئاخوندی چالاک بین و چیتر ڕێگه‌‌‌ بە‌ سووکایه‌‌‌تی و چه‌‌‌وسانه‌‌‌وه‌‌‌ و دژایه‌‌‌تی کردنی ئافره‌‌‌تان نەدەین.

داوا لە هاونیشتمانیانی کوردستان دەکەین بە سەردانی خانەوادەی ئەمینی و بەتایبەت دایکو بابی ژینا لەم کۆست و خەمە گەورەدا هاوبەش و شەریکیان بن.

سازمانی خه‌‌‌باتی کوردستانی ئێران وێڕای مەحکوم کردن و پرۆتستۆی ئەم جینایەتەی هێزەکانی رژیمی ئاخوندی، داوا له‌‌‌ هه‌‌‌موو هێزه‌‌‌ تێکۆشه‌‌‌ره‌‌‌کان، ناوه‌‌‌نده‌‌‌‌کانی مافی مرۆڤ و کۆمەڵی نێونەتەوەیی ده‌‌‌کات که‌‌‌ لەبەرامبەر کردەوە دژە ئینسانیەکانی ئاخوندان هه‌‌‌ڵوێستی کاریگەریان هەبێ‌ و به‌‌‌توندی‌ کوشتنی ژینا ئەمینی مەحکوم و لیژنەیەکی تایبەت بۆ لێکۆڵینەوە لە کوشتنی ژینا رەوانەی ئێران بکەن.

سازمانی خه‌‌‌باتی کوردستانی ئێران له‌‌‌ دڵه‌‌‌وه‌‌‌ بەشداری خەم و پەژارەی خانەوادەی بەرێزی ئەمینی و خەڵکی کوردستان بە تێکڕاو خەڵکی شاری سەقز بە تایبەت ده‌‌‌کا و خۆی بە شەریکی و خەم و پەژارەیان دەزانێ‌.

مه‌‌‌رگ و نه‌‌‌مان بۆ ڕژیمی نه‌‌‌گریسی ئاخوندی

سازمانی خەباتی کوردستانی ئێران

کومیتەی ناوەندی

25 ی خەرمانانی 1401 کۆچی خۆری