بەرێوەچوونی کۆبوونەوەی ئاسایی کومیتەی ناوەندی سازمانی خەباتی کوردستانی ئێران

رۆژی یەکشەممە 27ی خەرمانانی 1401ی هەتاوی، کۆبوونەوەی مانگانەی کومیتەی ناوەندی سازمانی خەباتی کوردستانی ئێران بە ئامادەبوونی کاک بابەشێخی حوسەینی سکرتێری گشتی و ئەندامانی کومیتەی ناوەندی بەرێوەچوو.
لە سەرەتادا کاک بابەشێخ بە دەقیقەیەک وەستان و فاتیحەیەک بۆ گیانی پاکی شەهیدانی سازمانی خەبات و نەتەوەی کورد بەتایبەت شەهید ژینا (مەهسا) ئەمینی و لەسەروویانەوە رێبەری نەتەوەیی کورد و دامەزرێنەری سازمانی خەبات مامۆستا شێخ جەلال حوسەینی، کۆبوونەوەکەی کردەوە.
پاشان کاک بابەشێخ باسی لە شەهیدکرانی ژینا ئەمینی بە دەستی هێزە جینایەتکارەکانی رژیمی ئاخوندی کرد و جارێکی دیکە ئەو کردەوە نامرۆڤانەیە لە راست ژینا و باقی ژنان و ئافرەتانی کوردستان و ئێرانی مەحکوم کرد و بە ناوی سەرکردایەتی سازمان پرسە و سەرەخۆشی لە خانەوادەی ئەمینی، خەڵکی قارەمان و نیشتمانپەروەری شاری سەقز و کوردستان کرد. لە درێژەدا بەرێزیان راپۆرتێکی تێر و تەسەلی لەسەر رووداوە سیاسیەکانی جیهان بەتایبەت شەڕی ئوکراین و روسیە و کاریگەریەکانی لەسەر کۆمەڵگەی جیهانی، هەوڵەکانی چین و بۆ فشار خستنەسەر تایوان، نزیکی روسیە و چین و زۆر بابەت و باسی دیکەی پێوەندیدار بە جیهان.
بەرێز سکرتێری گشتی سازمانی خەبات لە بەشێکی دیکەی راپۆرتەکەییدا تیشکی خستەسەر دۆخی رژیمی ئاخوندی لە ئێران، خۆرهەڵاتی ناوەراست و سیاسەتی نێونەتەوەیی و هەڵسەنگاندنی بۆ پێگەی ئەو دەسەڵاتە کرد و وتی: رژیمی ئاخوندی لە ئێراندا تووشی قەیران و کێشەی زۆر بووەتەوە، کۆمەڵگەی ئێران بە تێکڕای چین و توێژەکانیەوە ئامادەی راپەرینن و خرۆشانی جەماوەری و ئاڵووگۆڕی بنەڕەتی لە ئان و سات دایە. هەروەها بەرێزیان پێگەی رژیمی لە خۆرهەڵاتی ناوەراست بە لاواز پێناسە کرد فەرمووی: رژیم لە عێراق، سوریە، لوبنان و یەمەن لە پاشەکشەدایە و لە ئێستادا توانای سەپاندنی سیاسەت و بەرنامەکانی خۆی بەسەر تاقم و دەستە تاوانکارەکانی نزیک لە خۆی نەماوە. لە پێوەند بە پێگەی رژیم لە کۆمەڵی نێو نەتەوەییدا رژیم گوتی: دەسەڵاتی ئاخوندی لە ئێستادا تەواو نائومێد بووە لە زیندوو کردنەوەی رێکەوتنی ناوکەیی و بۆی هەیە فشارەکانی ئەمریکا لەسەر ئەو دەسەڵاتە درێژەیان دەبێ. لەلایەکی دیکە روسیە و چین لە بابەت و پرسە سیاسی، سەربازی و ئابووریەکاندا تەنیا سوود و قازانجی خۆیان لەو دەسەڵاتە وەدەست دێنن دەنا رێزی بەرامبەریان بۆ ئەو دەسەڵاتە نیە و مەساڵحی خۆیان ناکەنە قوربانی رژیم.
لە پەیوەند بە کوردستانی ئێران بەرێز سکرتێری گشتی ئیشارەی بە دۆخی خەڵکی کوردستان و سیاسەتەکانی دەسەڵاتی ئاخوندی کرد و وتی: کوردستان هەر وەک چۆن لە رابردوودا وەکوو ناوچەیەکی پەراوێزخراو و بێ بەشک لەلایەن رژیمەوە هەڵسووکەوتی لەگەڵ دەکرا، لە ئێستاشدا هەمان سیاسەت لە ئارادایە و بگرە شار و ناوچەکانی کوردستان زیاتر میلیتاریزە کراوە و لە باری خزمەتگوزاریەکان لە ناوچەکانی دیکەی ئێران بە ئانقەست دواخراوە.
کاک بابەشێخ حوسەینی لە بەشێکی دیکەی راپۆرتەکەیدا باسی کەشی ئەمنیەتی شارەکانی کوردستان و بەربەست و تەنگوچەڵەمەکانی بەردەم چالاکانی ناوخۆ کرد و گوتی: چالاکانی ناوخۆ لە هەموو بارەکان هەوڵ دەدەن سیاسەتەکانی رژیم لە راست کۆمەڵگە، ژینگە و خاکی کوردستان بێ کاریگەر بکەن هەر بۆیە رژیم لە هەر جوڵەیەکی چالاکان مەدەنی بە گومانە و بەردەوام دەیانخاتە ژێر فشار و لەلایەن ئەو دەسەڵاتەوە تووشی گرتن و زیندان و شکەنجە دەبنەوە.
لەبارەی دۆخی ئافرەتان لە کوردستان کاک بابەشێخ وتی: ئافرەتانی کورد لە ژیانێکی قورس و حەستەمدان. لەلایەن سیستەمی دواکەوتووی ئاخوندان ئامراز و هۆیەکە بۆ چەوسانەوەی ئافرەتان لەلایەکی دیکە کەلتوری و داب و نەریتی کۆمەڵگە بۆ ئافرەتانی کوردستان کێشە و گرفتی زۆر دروست دەکات. گرتن و زیندانی و شکەنجە کردنی سوعدا خەدیرزادە، کوشتنی شلێر رەسووڵی لە مەریوان و شەهیدکرانی ژینا ئەمینی لەلایەن دامودەزگاکانی رژیمی ئاخوندیەوە، لێدان و ئازار و ژن کوژیەکان نمونەی نوێی ئەو تاوانانەن کە لە راست ژنان و ئافرەتانی کوردستان هاتۆتە ئاراوە. بەڵام لەگەڵ هەموو ئەوانەدا ئافرەتانی کورد نمونەی شۆرشگێڕی، پاکی و سەداقتن و بزوتنەوەی کوردستان و سازمانی خەبات بەتایبەتی بە رەنج و زەحمەت و ماندووبوونی ژنان و ئافرەتان ماوەتەوەو پێشکەوتووە.
کاری ئورگانەکانی سازمانی خەبات و پێداچوونەوە بە کارو تێکۆشانی ئورگانە جیاجیاکانی سازمان بەشێکی دیکە لە باس و بابەتەکانی کۆبوونەوەی کومیتەی ناوەندی بوو کە لە دوای راپۆرتی سکرتێری گشتی، ئەندامانی کومیتەی ناوەندی راوبۆچوونی خۆیان لەسەر دەربڕین.
لە کۆتاییدا کۆبوونەوە بۆ هەر ئورگانە و کۆمەڵێک بڕیار و راسپاردەی پەسەند کرد و خرایە بەردەم بەرپرسی ئورگانەکان.