راگەێندراوی کومیتەی ناوەندی سازمانی خەباتی کوردستانی ئێران، بە بۆنەی ٣٥ ساڵەی دامەزراندنی سازمانی خەباتی کوردستانی ئیرانەوە

هاو نیشتمانیانی تێکۆشەر، خەلکی خەباتگێڕی کوردستان!                 

کەس و کار و بنەمالەی سەربەرزی شەهیدان!

ئەندام و لایەنگران و پێشمەرگە قارەمانەکانی سازمانی خەباتی کوردستانی ئێران!.

ئەوا دیسان ئەستێرەی پڕ تیرێژی ٥ی خەرمانان،لە ئاسۆی بڵندی چیای تێکۆشان و خۆراگری خەباتی رزگاریخوازانەی گەلی کورد لە کوردستانی ئێران، خۆی دەرخستەوە. سەر لە نوێ شنەی شەماڵی دل لاوێنی خەرمانان، فێنکی خستەوە دڵ و هەناوان. تەتەری خۆش خەبەری شۆڕش و خەبات، کارنامەی ساڵێکی تری لە خۆڕاگری وهەوڵ و تێکۆشانی رۆلەکانی گەلی کوردی لە ریزەکانی سازمانی خەباتی کوردستانی ئێران دا، کردە  دیاری و جێژنانەی جێژنی ٥ی خەرمانان و زۆر رۆح سووک و خوێن شیرین، گەیاندیە تێکڕای چین و توێژەکانی کوردستان.                                              

جەماوەری تێکۆشەری کوردستان!

 خەباتکارانی رێگای راستی خەباتی نەتەوایەتی و ئازادیخوازانی بە بڕیار و خاوەن وەرە و باوەڕ!     

       پێنجی خەرمانانی ئەمساڵ بیرەوەری ٣٥ساڵەی دامەزراندنی سازمانێکی خەباتگێڕ و فیداکاری کوردیە لە کوردستانی بن دەستی دەسەڵاتی رەشی رژیمی ئاخوندی دا  کە وەک پێویستێکی سەردەم و بۆ وڵامدانەوەی ویست و داخوازیەکانی چین و توێژێکی بەرین و بەرچاوی کۆمەڵگای کوردەواری و وەک بەرهەڵستکارێکی جێی متمانەی خاوەن باوەڕانی مافی نەتەوایەتی لە رۆژهەڵاتی کورستان ،لە دژی سەرەڕۆیی و بێ دەربەستی و خۆ پەرەستی و دیکتاتۆریی دەسەڵاتدارانی سەردەم لە ئێران دا هاتە ئاراوە. سازمانێک  کە دوای تاوتوێکردنێکی وردی زانستیانە و هەڵسەنگاندنێکی مەنتیقیانەی هەل و مەرج و قۆناغ، لە بیرو هزری مرۆڤی زانا و خەباتگێڕ و دەربەست بە مافەکانی مرۆڤ و لەسەروویانەوە جەنابی مامۆستا سەیید جەلال حوسێنی و  بۆ دابین کردنی ئازادی و سەربەستی نەتەوە و نیشتمان و نەهێشتنی دواکەوتوویی و ژێر دەستیەوە گەڵاڵەکرا و لە چوارچێوەی دامەزراوە و سازیێکی سەربەخۆی بڕیاردەر و خۆراگر و بە دەربەست و خاوەن هەڵوێست و پرینسیبی سیاسی دیموکراتخواز و فیداکاردا ،خۆی نواند . هەر دوابەدوای خۆناساندن و بڵاوکردنەوەی یەکەم راگەێندراوی ئەم سازمانە، جەماوەری کوردەواری بە هەموو چین و توێژەکانیەوە لە دەوری کۆبونەوە و لە ماوەێکی کورتدا بووە یەکێک لە لایەنە بەرچاوەکانی کوردستانی و لە سەنگەری پێشەوەی خەبات بۆ وەدی هێنانی مافە زەوتکراوەکانی کورد دا لە هیچ چەشنە فیداکاری و دڵسۆزێک بۆ نەتەوە و نیشتمان کۆتایی نەکرد.                                                                          سازمانی خەباتی کوردستانی ئێران لە رەوتی بەرەوپیش چوون و هەڵدان و پیگەیشتنی خویدا، گەلیک قۆناغ و هەل و مەرجی دژوار و زۆر هەوراز و نشێوی بڕیون و بە سەر زۆر کەند و کۆسپ دا زاڵ و سەرکەوتوو بووە کە ئەگەر رەسەنایەتی  بیر و باوەڕ و هەڵبژاردنی گونجاوترین خەت و رێبازی سیاسی و خوێندنەوەێکی سەردەمیانەی رووداوەکان و راستگۆیی و خۆ گونجاندن لەگەڵ ویست و داخوازییەکانی گەل و شۆڕش و فیداکاریی پێویستی رۆڵە بە شەرەفەکانی ئەم رێبازە و ژیری و وردبینی سەرکردایەتی و گۆڕانکاری بەردەوام لە شێوەی کار و چاڵاکی سیاسەت و رەوتی کاری ئەم سازمانەدا نەبووایە، سازمانی خەباتیش وەک زۆر لایەن و جەریانی تر،چ کوردی و چ غەیرە کوردی کە نەک هەر نەیان توانی خۆ راگرن و بوونی خۆیان بپارێزن، بەڵکو هەر ئاسەواریشیان نەما و لە بیر جەماوەر و تەنانەت دامەزرێنەر و پەیڕەوانیشیان چوونەوە، ئاسەواری نەدەما و خوێن و رەنجی شەهیدان و دڵسۆزانی بە فیڕۆ دەچوو، بەڵام کاتێک کە داوا و رێباز و بیر و باوەڕ رەسەن و بەڕێوەبەری دڵسۆز و ژیر و  کادر و بەدەنەی فیداکار و تێگەیشتوو بوون ، بەردەوامی و بەرەو پێشچوون و هەڵدان و پێشکەوتن و پێگەیشتن و هاو تەریب بوون لەگەڵ رەوتی بەرەو پێشچوونی رووداوەکان و هاوئاهەنگی و سەرئەنجام یەک دەنگی و هاوهەڵوێستی لەگەڵ لایەنی تری هاوبەش و هاو ئامانج دا، مسۆگەر دەبێ و کەس ناتوانێ بەر لە راستی و رەوایی و هەوڵ و تێکۆشانی وەها سازمان و لایەنێک بگرێ. 

بە خۆشیەوە سازمانی خەباتی کوردستانی ئێران ، خاوەنی هەموو ئەو پرێنسیب و خاڵە ئەرێنیانەیە کە دەبێ لایەن و دامەزراوەێکی کوردی رەسەن و خەباتگێڕ بۆ رزگاری گەل و ئاوەدانی و پێشکەوتنی نیشتمان هەیبێ.  سازمانی خەبات لە هەل و مەرجێکی وادا هاتە ئاراوە کە لە لایەکەوە رژیمی رەگەزپەرســت و خورافاتی  ئاخوندی، بە رێبەرایەتی دڵڕەش و خوین مژترین دیکتاتۆر (خومەینی) لە ژیر درشــــــــــــــم   و ئاڵای ئێسلام دا ، وڵامی داخوازیە رەواکانی گەلی کوردی موسڵمانی بە لەشکر کێشی و فتـــــــــوای جیهاد و لە ناوبردنی گەلی کورد و سڕینەوەی ناوی نیشتمانمان ،، کوردستان ،، لە سەر نەخــــشــــــــــــەی جوغڕافیا دایەوە و لە لایەکی تریشەوە خاوەن باوەرانی رێبازی چەپ لە چوار چێوەی حــیــــــــــــزب    و رێکخراوی کوردی و غەیرە کوردی دا ، کوردستانیان کردبووە سەنگەری دژی رژیمی بەناو ئێسلامی ئاخونـــدی . لە وەها هەل ومەرجێک دا بۆ وڵامی بەهانەی لەشکرکێشی رژیم و خەبات بۆ رزگاری و رێـــز گـــرتن لـــــــە هەست و بیر و باوەری کۆمەڵانی موسڵمانی کورد  ، لە سەنگەری خەباتی رەوای دژی داگیر کەرانی کوردستان دا، سازمانی خەبات ی کوردستان بوونی خۆی راگەیاند .

  بە لە بەر چاوگرتنی ئەو راستیانەی باسکراون ، دامەزراندنی سازمانی خەبات  لەو قۆناغەی خەباتی کورد لە کوردستانی بن دەستی ئێراندا ، پێویستێکــــــــــــــــی حاشا هەڵنەگر بوو. هەر بۆیە مامۆستا سەید جەلال حوسەینی و کۆمەڵێک مامۆستای ئایینی شۆڕشگێڕ و روناکـــــــبیر و کەسانــــــــــــــی خاوەن رابردووی پاکی کوردایەتی، گەڵالەی وەها سازمانێکیان داڕشت و پاش تاوتوێ کردن و هەڵ سەنگاندنـــــــی هەل و مەرجەکە ، لە ژێر ناوی رێکخراوی خەباتی نەتەوایەتی و ئیسلامی کوردستانی ئێران دا ، بوونـــــــی خۆی وەک رێکخراوێکی سیاسی شۆڕشگێڕ  راگەیانــد.  ئەمە لە لایەکەوە باشترین وڵام و چـــــــەک بــــــوو بۆ بەربەرەکانی رژیمی دژی گەلی بەناو ئیسلامی ئاخوندی و لە لایەکی تریشەوە سەنگەریکی تری قایمـی خەباتی رزگاریخوازانەی گەلی کورد بوو بۆ ئەو کەس و چین و توێژانەی کە باوەڕیان بە مافە رەواکانــــــی کورد و خەبات کردن بۆ وەدەست هێنانی ئەو مافانەیان هەبوو. بەڵام تا ئەو دەم رێکخراو و حیــزبێکــی لایەنێکی بـە باوەڕی خۆیان لەو گۆڕەپانەدا نەدەدی . 

   سازمانی خەبات لە رەوتی شۆڕشی رەوای گەلی کورد لە دژی دژمنی داگیر کەر لە کوردستانـــــی بن دەستی ئێران لە سەنگەری چەکداری دا، زۆر حەماسە و شانازی خوڵقاندوون کـە بۆ هەمیشە مــــــێـــــــژووی خەباتی رەوای گەلەکەمان شانازیان پێوەدەکا و بە سەرخەتی دیار و بەرچاو لە سەر لاپەڕەکانی خـــــۆی دەیان نووسێ و بە یادگار بۆ نەوە و قۆناغەکانی داهاتووی دوور و نزیکی گەلەکەمانیان هەڵدەگــــــــــــــرێ . ئەو خوێن و خەبات و رەنجەی کە سازمانی خەبات لەو پێناوە دا پێشکەشی کردوون، ئەگەر بەرچاوتر لە زحمەت و تێکۆشانێک کە لە مەودای شۆڕشی رەوای گەلی کورد بە درێژایی مێژوو پێشکەش کراون ، کەم رەنگتـــــر نەبوون و نین. هەر بۆیەشە لە داوی تێپەڕ بوونی ٣٥ ساڵ بە سەر تەمەنــــــــی ئەم سازمانە دا، خەباتیەکان و ریبـوارانی ئەم رێگا و رێبازە ، هەر وا دڵ پڕ لە هـــــیوا بە رزگاری وسەر کەوتــــــــن ، لــــــــە سەنگەری خەبات و بەرخودان دا ماون و شان بە شانی باقی حیزب و رێکخراوە ئازادیخـوازەکـــانـــی نـــــاو گۆڕەپانی خەباتی رەوای کوردستان و تێکۆشان و موبارەزەی سەرتاسەری لە ئێران دا، دیارن و خاوەن جێ پەنجــە و هەنگــاون و هەر ئێستا بە کردەوە لە سەنگەری دیفاع لە نەتەوە و نیشتمان لە دژی داعش و نەیارانی کوردو وکوردستان فیداکاری دەکەن .

ئەوەی لە مێژووی پڕسەروەری سازمانی خەبات دا جێگەی تێرامان و لێوردبوونەوەیە ئاستی کرانەوە و ئەمرۆیی بوونی ئەو تەشکیلاتەیە و ئەو ئاڵوگۆرە سیاسیانەی بەسەر خەت و رێباز و بەرنامەی سازمانی خەبات لە جەریانی کۆنگرەی سێهەمی سازمانی خەبات هاتە ئارا وەک گۆرینی ناو و ئامانجی سازمانی خەبات بۆ حیزبێکی نەتەوەیی و نیشتمانی کە لە پێناو دامەزراندنی حکوومەتێکی دیموکراتیک و پارلەمانی تێکۆشانی بەردەوام دەکات، دەرخەری ئاستی کراوەیی و ووشیاری و بە رۆژبوون و چەق نەبەستنی رێکخراوەکەمانە.

 ئەوەی کەدەبێ بە بێ لە خۆبایی بوون پەیڕەوان و هاوباوەڕانی رێبازی سازمانی خەباتی کوردستانی ئێران شانازی پێوە بکەن ، ئەو بیر و باوەڕە بێخەوشە کوردایەتیە خۆماڵیانە و خەباتی نەتەوایەتی و ئاشتیخوازانەیە کە داوی ٣٥ ساڵ بە بێ دوودڵی و ماندوو بوون، پەرەی پێ دەدرێ و قۆناغ لە دوای قۆناغ بە پێی پێداویستی سەردەم و هاوتەریب لەگەڵ ئاڵ و گۆڕە نێونەتەوەیی و ناوچەییەکان ، پەرەی پێدراوە و رەنگ و بۆی سڵ کردن و نامۆیی لێ کەم و کاڵ کراوەتەوە و لە چوارچێوەی تەسکی ئیدئۆلۆژی دا هێندراوەتە دەر و شان بە شانی لا‌یەنە جێ باوەڕ و متمانەکانی تری سەر گۆڕەپانی سیاسی و خەباتی رەوای کوردایەتی بۆ رزگاری نەتەوە و نیشتمان دەوری بەر چاوی هەیە. بە جۆرێک کە لە باس و خواس و رووداوەکان دا خاوەن دەنگ و ناوە و بە ئیقراری بەشیکی زۆر لە وانەی کە لە سەرەتای دروست بوونی دا نەیاریان دەکرد و رێگەیان لە پەرەگرتنی دەگرت ، یەکێک لە لایەنە خاوەن هەڵوێست و دەنگەکانە و ناکرێ لە پەراوێز خرێ و لە معادەلاتە سیاسیەکانی ئەم سەردەمەی شۆڕشی رەوای کورد لە  رۆژهەڵاتی کوردستان دا دەر هاوێژرێ.

ئەندامان و لایەنگرانی سازمانی خەبات ی کوردستانی ئێران!

   لێرەدا وێڕای دەستخۆشی لە هەموو دڵسۆزانی سازمانی خەباتی کوردستانی ئێران ، رۆژی پێنجی خەرمانان، ٣٥ هەمین ساڵرۆژی دامەزراندنی سازمانی خەبات بە هەموو  ئەندام و لایەنگران و دۆستانی، پیرۆزبایی دەلێن و سڵاو دەنێرین بۆ گیانی بەرز و پیرۆزی مامۆستا سەیید جەلال حسێنی دامەزرێنەر و رێبەری هەرگیز نەمر و سەرجەم شەهیدانی سازمانی خەبات و رێگەی رزگاریی کوردستان و سەری رێز بۆ بنەماڵە و کەس و کاریان دادەنوێنین. سڵاو دەنێرین بۆ زیندانیانی سیاسی و قەڵافەتی مێرانەی چالاکانی سیاسی و شۆڕشگێڕانی رێگای رزگاری نێشتمان و خاوەن هەڵوێستانی بە باوەڕ لە ئامێزی خۆشەویستی دەگرین . وەک رێبوارانی رێگای شەهیدان ، روو دەکەینە‌ هەموو ئەوانەی کە خۆیان بە دڵسۆزی شۆڕش و هەڵگری بیرو باوەڕی خەباتی رەوای گەلی کورد دەزانن و لە روانگەی سازمانی خەباتی کوردستانی ئێرانەوە دەڕواننە ئاسۆی رزگاری نەتەوەکەمان، دەڵێن: وەرن با بیرەووری 5ی خەرمانان بکەینە وزەو تین بۆ هەوڵ و تێکۆشانمان لە پێناو خەباتی رەوای گەلەکەماندا. وەرن با بە بێ دوودڵی، چاکی دڵسۆزی لێ بەلادا کەین و هەر کام لە بەر خۆمانەوە بە پێی گەڵاڵە و بەرنامەی دیاری کراو لە بەر رووناکی رێ و شوێن و بڕیارەکانی سازمان دا، دەست بدەینە دەستی یەک و چی لەم پێناوەدا لەدەستمان دێ کۆتایی نەکەین. دڵنیا بن هەموومان بە هاوکاری و هاو فکری یەکتری دەتوانین بە باشترین شێوە خزمەت بکەین و رووحی شەهیدەکانمان شاد و شانازی بۆ خــۆمان دەستەبەر بکەین! 

  بەرز و پیرۆز بێ یادی ٣٥ ساڵەی پێنجی خەرمانان،ئەستێرەی پێنج پەڕی ئاسمانی خەباتی نەتەوایەتی کورد لە کوردستانی ئێران.

 بژی کورد، ئازاد و ئاوەدان بێ کوردستان.! 

سازمانی خەباتی کوردستانی ئێران

کومیتەی ناوەندی

27ی ئۆگۆستی ٢٠ ١٥ی زایینی بەرانبەر بە 5ی خەرمانانی ١٣٩٤ کۆجی خۆری.