سازمانی خه‌بات ی
کوردستانی
ئێران
خەباتمێدیا: دەزگا ئەمنییەکانی کۆماری ئازەربایجان شەش کەسیان بە تۆمەتی هەوڵدان بۆ "کودەتای سەربازی" و ڕووخاندنی حکومەتی سکۆلاری ئەو وڵاتەو هەوڵدان بۆ دانانی ڕژیمێکی مەزهەبی لایەنگری ڕژیمی ئاخوندی ئێرانی گرتووە.
بەگوێرەی ڕاپۆرتی بلومبێرگ، ڕۆژی پێنجشەممە ١٧ی خاکەلێوەی ۱۴۰۲ی هەتاوی، وەزارەتی ناوخۆ وە دەزگای ئاسایشی کۆماری ئازەربایجان لە بەیاننامەیەکی هاوبەشدا ڕایانگەیاندووە کە ئەو کەسانەی کە گرتوویانە هەموویان خەڵکی ئازەربایجانن و تۆمەتبارن بەوەی کە ئەندامی گرووپێکن کە پارە و فەرمانیان لە ڕژیمی ئاخوندی ئێران بۆ ناسەقامگیری و دەستپێکردنی یاخیبوونی چەکداری" لە ئازەربایجان وەرگرتووە.
بەگوێرەی زانیارییەکان، لە ماوەی چەند حەوتووی ڕابردوودا دەیان هاووڵاتی ئازەربایجانی بە تۆمەتی پەیوەندی لەگەڵ ڕژیمی ئێران گیراون، ئەمەش لە کاتێکدایە کە گرژییەکانی نێوان هەردوو وڵات لەسەر کۆمەڵێک پرس و لەوانە ئیسرائیل و ململانێی ئازەربایجان لەگەڵ ئەرمەنیستان پەرەی سەندووە.
لەماوەی چەند ساڵی ڕابردوودا گرژییەکانی نێوان هەردوو وڵات بەردەوامی هەیە و ئەمەش دوایین گرژیی نێوان باکۆ و تارانە.
دوای ئەوەی کەسێکی چەکدار هێرشی کردە سەر باڵیۆزخانەی کۆماری ئازەربایجان لە تاران، کە بووە هۆی کوشتنی بەرپرسی هێزە ئەمنییەکانی کۆماری ئازەربایجان و بووە هۆی داخستنی باڵیۆزخانەی کۆماری ئازەربایجان لە تاران پەیوەندییەکانی نێوان هەردوو وڵات لە مانگی ژانویەی ئەمساڵدا هەتا دێ کەمتر دەبێتەوە.
