فڕینی فەریناز و بێدادی دەسەڵاتداران!

20 مانگ لەوە پێش کچە کوردێک کە لەلایەن مۆرەیەکی رژێمەوە خەریک بوو دەستدرێژی بکرێتە سەر، لە پەنجەرەی نۆهەمی چوارەمی هوتێل تارای شاری مەهابادەوە خۆی خستەخوارەوە و گیانی دا. ئەگەر چاوێک لە کاردانەوەی خەڵکی مەهاباد و هەوڵی ڕەندانەی حکومەت بکەین، هێز و غیرەتی خەڵک و لاوازی دۆشدامانی دەسەڵاتداران دەبینین. ئەگەر چاوێک لە کاردانەوەی خەڵکی مەهاباد و هەوڵی ڕەندانەی حکومەت بکەین، هێز و غیرەتی خەڵک و لاوازی دۆشدامانی دەسەڵاتداران دەبینین. لە دوای ئەو رووداوەی کە کچێک گیانی دا بەڵام تەسلیمی هەواو هەوەسی پیسی مۆرەکانی رژێم نەبوو، هەزاران کەس لە خەڵکی مەهاباد و شارەکانی دیکەی کوردستان رژانە سەرشەقام. بەڵێ لاوانی بەغیرەت هەر بە بیستنی هەواڵی خۆکوژی فەریناز و نیەتی گڵاوی خۆفرۆشانی وەزارەتی ئیتلاعاتی رژێم، خوێنیان وەجۆش هات و دژ بە ناوەندە سەرکوتگەرەکانی حکومەت خرۆشان و ئاگریان لە زۆربەی ئەو شوێنانەی رژێم بەردا کە بەردەستیان کەوت. ئەوە یەکەم کاردانەوەی خەڵکی تورەی ئەو شارە لە بەرامبەر کردەوەی گڵاوی دەسەڵاتداران و خۆفرۆشانی پشتیوانی مۆرەکەی ئیتلاعات بوو. هەر زوو فەرمانداری ئەو شارە رایگەیاند کە ئەو کەسە "س.م.ه"ی ناوەو باوەڕ بکەن مۆرەی ئیتلاعات نیە و لە هوتێل کەهریزەکی تاران وەک راوێژکار لە هوتێل تارا جێگیر بووە بۆ ئەوەی لەبارەی بەرزکردنەوەی دەرەجەی هوتێل تارا یارمەتی و هاوکاری بەرپرسانی هوتێل تارا بدات. دوای ئەوە گوترا ناوبراو "س.م.ه" تازە ژنەکەی تەڵاق داوەو بۆ ئەنجامی سەرەجێیی چووەتە مەهاباد و لەو کارەدا بەرێوەبەری هوتێلەکە هاوکاری کردوە. دوو ئەنجامی قەزایی و سیاسی: کەسی دەستدرێژی کەر (مورتەزا هاشمی یان  س.م.ه یان کەسێک کە بە هۆی ئەمنیەتی ناوی بە دروستی ئاشکرا نەکرا) ئازادە.

 لە هەر کوێ یە ئازادە. روون نیە کە کێ بوو و چی کرد و چی دەکا. بەڵام ئەو کەسانەی کە دژ بە کردەوەی گڵاوی ئەو وە بۆ دیفاع لە قوربانی "فەریناز" ناڕەزایەتیان دەربڕی و پێگەکانی بێ غیرەتی و فریویان ئاگردا دەستگیر کران. خاڵی جێی سەرنج ئەوەیە کە لە دوای 20 مانگ تازە دووبارە پەروەندەی ئەو رووداوە وەگەر خراوەو حوکمی قەزایی دەرچووە، بەڵام نە پەروەندەی تاوان لە هوتێل تارا و سزای مۆرە نهێنیەکەی ئیتلاعات، بەڵکوو سزا و پەروەندەی ئەو 12 کەسەی کە دژ بە بێ غیرەتی خاوەن هوتێل و دەسەڵاتدارانی رژانە شەقامەکان. بەپێی ئەو حوکمە 12کەس لە لاوانی ناڕازی حوکمی 12 ساڵ زیندان و دانی 16 ملوێن و دووسەد و دە هەزار تمەن بە هۆی "زیان گەیاندن بە کەل و پەلی بەیتولمال" سزا دراون. بەو حوکمە تاوانباری سەرەکی کە دەستدرێژی بۆ سەر نامووسی خەڵک کرد، لە نێو ئەو حوکمی زیندان و سزای مادەیەدا ون کرا. هەر وەک دەیان و سەدان رووداوی هاوشێوە. وەکوو رووداوی قورئان خوێنی تایبەتی خامنەیی کە لە دوای 5 ساڵ شکات و تۆبە نامە و دیانپێدانان لە ماڵی وەلی فەقیە مەسەلە پەردەپۆش کراو قوربانیەکانیش لەلایەن سەرۆکی جەلادی دەزگای قەزاییەوە هەڕەشەیان لێ کرا. هەروەها بە لەبابەت مەسەلەی تۆمەتی تێکدانی کەل و پەلی حکومەتی و نیمە حکومەتی دەتوانین تەزاهورات و تێکدانی سەفارەتی بریتانیا و عەرەبستان لەلایەن بەسیجیەکانەوە وەبیر بێنینەوە. ناڕەزایەتی: تێکدان و ئاگردان بەشێوەی "خۆرسک" کە یەکیان بە تەواوی چاوپۆشی لێدەکرێ و یەکیان بە سەپاندنی سزا و زیندان سەرکوت دەکرێ. ئاکامی قەزایی: ئەنجام ئەوەیە کە لە سیستەمی دادوەری رژێمدا هیچ کات تاوان پێناسەی خۆی وەرنەگرتووەو بەرواردی رێژەی تاوانباری "تاوانە". گرینگ نیە چ تاوانێک کراوە گرینگ ئەوەیە کە کێ ئەنجامی داوە. ئەگەر ملیاران دولار لە بەیتولماڵ لەلایەن نزیکانی خامنەییەوە دەستی بەسەردا بگیرێ و ئەگەر دزی زەویەکانی قوم و وەرامین و... سەرۆکی دەزگای قەزایی خامنەیی بێ و بەرتیل و دزی ملیاردی لەلایەن سەربازانی گومناو و مۆرەکانی نیزامەوە ئەنجام بدرێ کەس حوکم نادرێ، بەڵام ئەگەر کەسێک نەک ملیاردێ بەڵکوو دولارێک لە کیسەی سەرمایەدارێک دەربێنێ و سەر بە وەلایەت و وەزارەت و ... نەبێ دەستی دەبڕدرێتەوە. زۆر نمونەی لەو چەشنەمان دیوەو ئێستاش رۆژانە شاهیدی بابەتی لەو جۆرەین کە زۆرێک لە لاوان و مێرمنداڵانی وەڵات بە هۆی فشاری ژیان و هەژاریەوە مەجبور دەکەونە داوی بەکارهێنان و بڵاوکردنەوەی مەوادی هۆشبەر و دەستە دەستە لەسێدارە دەدرێن، بەڵام ئەوەی کە جۆرەها مەوادی هۆشبەر بە کانتیتێر هاوردە و دابەش دەکا هیچ لێپرسینەوەیەکی لێ ناکرێ. وە هەر وەک دەبینین قەنارە و بەرباران و قەمچی و زیندان چارەنووسی تاوانبارانی ناحکومەتیە بەڵام دزە حکومەتیەکان و موچەخۆرانی نجومی و قورئان خوێنی بەیت تەراتێن دەکەن. ئەگەر زیان بە سەفارەتی ئینگلیس و عەرەبستان لەلایەن تاقمێک قەمەبەدەست و قەدارەبەنی وەلی فەقیە (لەگەڵ ئەوەی کە لە کاری دیپلۆماتیکدا رێگەپێدراو نیە و بە دەستدرێژی بۆسەر ئەو وەڵاتە دێتە ئەژمار) کێشە نیە، بەڵام ئەگەر چەند لاوێکی بە غیرەت دژ بە گەندەڵی و بەد رەوشتی و بێ ناموسی و دەستدرێژی بۆ سەر گیان و ماڵ و نامووسی خەڵک رژانە سەر شەقام حوکمی 12 ساڵ زیندان و 16 ملوێن تمەنیان بەسەردا دەسەپێ. ئەنجامی سیاسی: بێگوومان ئەو رێژە لە ناتەبایی و لێکترازان لە سەرەوەی نیزام نیشانەی هێز و توندوتۆڵی نیە بەڵکوو دەرخەری لاوازی و دۆش دامانی رژێم لە بەرزترین خاڵدایە. بەڵێ وەلی فەقیە لە هەنگاوەکانی کۆتایی دا تەنیایە و هیچ پشت و پەنایەکی نیە. هەر چەند رژێم هەر لە بەرێ ڕا بەو جۆرە بووە بەڵام لە ئێستا لە رەوشێکی خراپتردایە بۆیە مەجبورە بەو جۆرە حوکم دەربکات بۆ ئەوەی مۆرەکانی پشتی تێ نەکەن.

 رژێم مەجبورە لە دوای دوو ساڵ هەندی پەروەندە بخاتەوە روو، هەندێ بشارێتەوەو بە هاشو هوش بە خەیاڵی خۆی ئاوی چاوی خەڵک بگرێ و بەو جۆرە خۆی و دەسەڵاتەکەی راگرێ. ئەگەر وەلی فەقیە جوێ لە سپا و ئیتلاعات کەمترین پشت و پەنایەکی هەبایە لانی کەم دەیتوانی مۆرەیەکی پیس و وەحشی خۆی لە شوێنێکی گشتی دا بەردباران بکا. ئەگەر وەلی فەقیە تەلیسمی نەشکابوو و پێویستی بە پشتیوانی سپای پاسداران نەبوو لانی کەم بەشێک لە داهاتی گشتی و سەرمایەی خەڵکی لە دەست سپا دەردێناو بۆ ئەوەی لە کەرتی بەرهەمهێنان و کشت و کاڵ دا بەکاری دێنان و بەو شێوە ئابووری وەڵات هەناسەیەکی وەبەر دەهات. بەڵام لاواز و بێ پەناو بێ توانایە و ناتوانێ‌. چوونکە بە گەشانەوەی ئابووری رێگەی هەناسەی خۆی بەرتەسک و دەبەسترێ. بۆیە تاوان بەلایەوە گرینگ نیە، هەر چیەک بێ کێشە نیە، بۆ ئەو گرینگ تاوانبارەکەیە. ئەگەر پێویست بکات شکاتکار لەسێدارە و تاوانبار ئازاد و پارێزراو. جەلاد و تاوانکار ئازاد و شکات کار و قوربانی زیندان و ئێعدام دەکا. ئەو قانوونەی وەلی فەقیە روو لە کۆتاییە، رژێمەکەی درزی تێکەوتووە و تەڵەزمی لێدەبێتەوەو پروتکاوەو هێزەکانی بەرەو داروخان بوون و لەبەر دەردەچن و هەر رۆژە لەگەڵ قەیرانێک بەرەوڕووە. قەیرانی موچەی نجومی، قەیرانی گەندەڵی و دزیە حکومەتیەکان، قەیرانی کوشتار و دادخوازی و بێکاری و تورەیی جەماوەر کە رۆژ لە دوای رۆژ زیاتر کڵپە دەکا.