سازمانی خه‌بات ی
کوردستانی
ئێران
عەلی بەهرامی
رۆژی ٢ی بەفرانباری ١٤٠٢ی هەتاوی ئاخوند خامنەیی لە دیدار لەگەڵ ژمارەیەک کەس لە خوزستان و کرمان، داوای کرد بە شێوەی بەربڵاو بەشداری لە شانۆی هەڵبژاردنەکانی مەجلیسی خیبرەگان ڕێبەریی و مەجلیسی شۆرای ئیسلامی رژیمدا بکەن. ناوبراو لە قسەکانیدا پێداگری لەسەر پێویستی بەشداری بەرینی خەڵک کردەوەو وتی ئەگەر خەڵکی کەم بەشداری لەو هەڵبژاردنانەدا بکات ئەوە مەجلیس لاواز دەبێ و توانای چارەسەری کێشەکانی خەڵکی نابێ. خامنەیی لە درێژەی قسەکانیدا هەروەها وتی لە نەبوونی هەڵبژاردندا دیکتاتۆری دروست دەبێ و ئاسایش تێکدەچێ و بشێوی و ئاژاوە ساز دەبێ.
ئاخوندی تاوانکار خامنەیی، لەکاتێکدا پێداگری لەسەر بەرێوەبردنی هەڵبژاردن و بەشداریی بەربڵاوی خەڵکی ئێران دەکاتەوە کە لە مێژووی رژیمەکەیدا هەڵبژاردن میکانیزمێک بووە بۆ شەرعیەتدان بە دەسەڵاتە نارەواکەی و چەواشەی خەڵک و قاییم و بەهێزتر کردنی پێگەی رژیمەکەی. لە ماوەی دەسەڵاتی ئاخونداندا بەو شانۆگەریانەی بە ناوی هەڵبژاردن بەرێوەچوون، دیارە بە چ میکانیزم و رێوشوێنگەلێک ئەم هەلبژاردنانە ئەنجام دراون و ئەو ئورگانانەی رژیمیش کە شانۆگەری هەڵبژاردنیان بۆ کراوە، دەسەڵاتەکانیان سنووردارە و نەک نەیانتوانیوە گرێیەک لە کێشەکانی خەڵکی ئێران بکەنەوە بەڵکوو هەر ئەوانە بوونەتە بارگرانی زیاتر لەسەر ژیانی ناهەمواری خەڵک. چوونکە فەلسەفەی بوونی ئەو ئورگانانە بۆ خزمەتی دەسەڵاتە نەک خەڵک.
لە دەسەلاتی ئێستای ئێراندا هەموو دەسەڵاتەکان لەلای وەلی فەقیهی رژیم کۆ کراوەتەوە و لە ئێستادا کە خامنەیی کەوتۆتە بانگەشە بۆ شانۆگەریەکانی خیبرەگان و مەجلیسی رژیم، بەهۆی باری لار و خراپی دەسەڵاتەکەی و بێ متمانەیی خەڵکە بە رژیمی ئاخوندی. خامنەیی لە کاتێکدا کەوتووەتە باسی هەڵبژاردن و زەروورەتەکانی کە لە چەند هەڵبژاردنی پێشووی مەجلیس و خیبرەگان و سەرۆککۆماریشدا، ئەو شانۆگەریانە لەلایەن خەڵکەوە بایکۆت کراون و رێژەی بەشداری ئەوندە کەم بوو کە بۆیان پینەو پەڕۆ نەدەکرا. راستی بابەتەکە ئەوەیە کە خامنەیی ترسی لێنیشتووە کە لە دوای شۆڕشی ژینا و خواستی زۆرینەی خەڵکی ئێران بۆ رووخانی رژیمی ئاخوندی، ئەگەر بچێتە ژێرباری ئەو بۆچوونەی کە شانۆگەری هەڵبژاردن لە دەسەڵاتی ئاخوندان نەکرێ، ئەوا بە کردەوە تەئیدی کاریگەری شۆڕشی ژینا لەسەر دەسەڵاتەکەی دەکات و بەوەیش رۆحیەی لایەنگران و جیرەخۆرەکانی زیاتر دەروخێ و رژیمەکەی زیاتر خەسار و زیان دەبینێ و لە شەپۆلەکانی دەیکەی شۆڕشە جەماوەریەکاندا زیانپەزیرتر و تێشکانیان ئاسانتر دەبێ، بۆیە خامنەیی بەشداری کەم و لاوازی خەڵکی پێ باشترە و بەو میکانیزمانەی بە دەستیانەوە لە شۆرای نیگابان و وەزارەتی ناوخۆ، هاوشێوەی شانۆگەریەکانی پێشوو بە دڵی خۆیان ئامار دەنووسن و بڵاوی دەکەنەوە.
ئەوەی لە هەموو قسەکانی دیکەی خامنەیی زیاتر سەرنج راکێش و بە جۆرێکیش گاڵتەئامێزە ئەوەیە کە خامنەیی هێشتا پێی وایە لە نەبوونی هەڵبژاردندا دیکتاتۆری دروست دەبێ! وەک بڵەی ٤٥ ساڵە ئێرانی ئاخوند لێدراو مەکۆی دێمۆکراسی و ئازادیە یان ئەوەی کە ناوبراو بۆ خۆی هەڵبژێردراوی هەڵبژاردنێکی پاک و بێگەردە، یان ئەوەی رەخنەگرەکانی لە شەقامەکانی تاران و شارەکانی دیکەدا بە ئازادی دەسوڕێنەوە، یاخود ویست و داواکانی خەڵکی ئێران بە دڵفراوانی و بە دوور لە هەر سەرکوت و چاو سوورکردنەوەیەک، وەڵام دەداتەوە. رژیمەکەی خامنەیی بەهۆی پێشێلکاری لە مافەکانی مرۆڤدا ٧٠ جار لە کۆڕی گشتی نەتەوە یەکگرتووەکان مەحکوم کراوە. لەبەر فیلتەری ئینتەرنێت، چاودێری، سەرکوت، گرتن و راوەدوونانی رۆژنامەنووسان و وێبلاگنووسان و چالاکانی تۆڕەکۆمەڵایەتیەکان و داخستنی رۆژنامەکان ساڵانە لەلایەن رێکخراوی راپۆرتدەرانی بێ سنوورەوە مەحکوم دەکرێ. بەهۆی پێشێلکردنی ئازادیەکانی خەڵکەوە ساڵانە لەلایەن ماڵی ئازادی لە ئەمریکا راپۆرتی لەسەر بڵاو دەکرێتەوە. لێبوردنی نێونەتەوەیی لەسەر گرتن و شکەنجە و ئێعدام لە ئێران بڵاوکراوەی بەردەوامی هەیە. هەروەها ئەو رژیمە بۆ ئێعدام لە پلەی یەکەمدا جێگەی گرتووە.
بێ گومان خەڵکی ئێران وەکوو تەنز و نوکتە لەو قسانەی ئاخوند خامنەیی دەڕوانن، چوونکە خەڵکی ئێران لەژێر دەسەڵاتی ئاخونداندا هیچ نەهامەتیەک نەماوە تەجروبەی نەکەن و بە دەست ئەو دەسەڵاتە دیکتاتۆر و گەندەڵ و فاسدەوە کێردیان بە ئێسک گەیشتووە و لە ئێستادا تەنیا و تەنیا هەڵبژاردەی خەڵک روخان و لەناوچوونی دەسەڵاتی ویلایەتی فەقیهە و رژیمەکەی خامنەییش بۆ شانۆگەریەکانیان هەر میکانیزم و ڕێوشوێنێک بگرنەبەر ناتوانن بایکۆتی گشتی خەڵک بشکێنن و پێش بە شەپۆلەکانی داهاتووی شۆڕشی ژینا بگرن کە ئامانجی کۆتایی پێهێنانی رژیمی ئاخوندیە و هێنانەدیی داهاتوویەکی گەشە بۆ نەتەوەکانی ئێران.
