لە ناوچەی سەردەشت کۆڵبەرێک بە تەقەی هێزەکانی رژێم بریندار دەکرێ

بەپێی هەواڵەکان، رۆژی پێنج شەممە 11ی سەرماوەز هێزە سەرکوتگەرەکانی رژێم لە ناوچەی سەردەشت دەسترێژ لە کۆمەڵێک کۆڵبەر دەکەن و لە ئاکامدا کۆڵبەرێک بە ناوی "رێبوار قادری" 22 ساڵە خەڵکی ناوچەی ئالان بە سەختی بریندار دەکرێ.

بە هۆی سەختی بریندەکەی ئەو کۆڵبەرە کوردە بۆ نەخۆشخانەی سەردەشت بەرێ دەکرێ و لە ئێستادا لە رەوشێکی جەستەیی ناجێگیردایە.

شاهیدان تەئکیدیان لە سەر ئەوە کردەوە کە هێزە سەرکوتگەرەکانی رژێم بە بێ هیچ ئاگاداریەکی پێشوەخت و راستەخۆ دەستڕێژیان لەو کۆڵبەرانە کردوە.

شایانی باسە هەر لە چەند رۆژی رابردوودا هێزە سەرکوتگەرەکانی رژێم لە ناوچەی مەریوان دەسترێژیان لە کۆڵبەرانی هەژار و زەحمەتکێش کرد کە بووە هۆی مردن و بریندار بوونی ژمارەیەکی دیکە کە ناوەکانیان بریتیە لە: کەماڵ بامەرز کە بەداخەوە گیانی دا، و چوار کۆڵبەری دیکە بەناوەکانی تۆفیق و عوسمان و جەمیل خەلیلی (جەمیل نەقاش) و محەمەدعەلی نادری کە برینەکانیان سەختە.