سازمانی خه‌بات ی
کوردستانی
ئێران
ئابرام پیلی جێگری نوێنەری تایبەتی وەزارەتی دەرەوەی ئەمریکا بۆ کاروباری ئێران ئێوارەی ڕۆژی یەکشەممە ٢٥ی خەرمانان لە گرتەیەکی ڤیدیۆیی کە لە تۆڕە کۆمەڵایەتییەکاندا و بەبۆنەی دووهەمین ساڵڕۆژی قەتڵی حکوومەتیی ژینا ئەمینی بە دەستی گەشتی ئێرشادی ڕێژیم بڵاوی کردووەتەوە ڕایگەیاند، مافی مرۆڤ و پاراستنی مرۆڤەکان ڕوانگەی حکوومەتی ئەمریکا بەرامبەر بە ئێرانە و واشنگتۆنیش لە لێپرسینەوە لە رژیمی ئێران لە بەرامبەر ڕەفتارە ناسەقامگیرکەرەکانی لە ناوەوە و دەرەوە وڵات بەردەوامە.
ناوبراو وتی کە ژینا ئەمینی بە هۆی نەبوونی ئەو حیجابە داسەپاوەی کە ڕێژیم دەیهەوێ گیرا و کوژرا. بەڵام دوای ئەوە ڕێژیمی ئێران لەگەڵ شۆڕشی سەرانسەری خەڵک بەرەوڕوو بووەوە و ئەو ڕێژیمە وڵامی ناڕەزایەتییەکانی دایەوە.
ڕێژیم بە کردەوەی دڕندانە کە بریتی بوو لە گرتنی بەکۆمەڵ، توندوتیژی و دەستدرێژی سێکسی، دانپێدانانی زۆرەملێ، ئەشکەنجەدان و لەسێدارەدان و دادگاییکردنی ساختە ڕووبەڕووی خەڵک بووەوە و ناڕەزایەتییەکانی خەڵک لە ئێران بە فەرمانی عەلی خامنەیی ڕێبەری ڕێژیمی ئاخوندی بە شێوەیەکی دڕندانە سەرکوت کرا.
ناوبراو لە بەشێکی دیکەی ڤیدیۆکەی خۆیدا ئاماژەی بەوە کرد کە دوو ساڵ دوای شەهیدکرانی ژینا، سەرکوتی رژیم لە دژی ژنان و کچان و کەمایەتییە ئایینی و نەتەوەییەکان بەردەوامە.
بۆیە ئابرام پپلی وتی ئەمریکا لە لێپرسینەوە لە رژیمی ئاخوندی لە بەرامبەر هەڵسوکەوتە دژە مافی مرۆیەکانی بەردەوام دەبێت و بە کردەوەی هاوشێوەی ئەم کردەوەی کە لەم حەفتەیەدا دژی ئەو حکوومەتە ڕایدەگەیەنێت بەردەوام فوشار دەخاتە سەری.
