سازمانی خه‌بات ی
کوردستانی
ئێران
ماردین زاهدی
یەکێک لەگرنگیترین بابەتەکانی جیهانی ئەمڕۆ ئازادی و هەوڵ بۆ ژیانی ئازاد لە کۆمەڵگەی مرۆڤایەتییە.
ئازادیەک کە لەوڵاتی ئێران دا بەدەستی حکومەتی دیکتاتۆر و خوێنڕێژی ئاخوندی زەوت کراوەو ڕێگە پێدراو نیە. ڕژیمێکی دیکتاتۆر و دژ بە ئازادی، کە زیاتر لە ۴۵ ساڵە ئەوەی جینایەت و تاوانە بەسەر خەڵکی ئەو وڵاتەدا دەیهێنێت و بۆ مانەوەی خۆی و پەرەپێدانی بیرۆکە کۆن و دواکەوتوەکەی، لەهیچ تاوانێک سڵ ناکاتەوە.
بەڵام لەبەرانبەر بەو ڕژیمە تاوانکار و دژە مرۆڤەدا کەسانێک بوونیان هەیە کە گیان و ژیانی خۆیان لەڕێگەی خەبات دژ بەو دەسەڵاتە داناوەو بوێرانەو دلێرانە بەباوڕێکی پتەو خۆنەویستانەو فیداکارانە مەتەرێزی خەباتیان هەڵبژاردوەو بونەتە پێشمەرگەو پارێزەری وڵات و نیشتمانەکەیان.
بەڵێ پێشمەرگە بوون لووتکەی شانازیەو لای خەڵکی ئازادیخواز هیچ سەربەرزیەک ناتوانێ لەو لوتکەیە زۆرتر بڕوات کە ئینسانێک گیانبازی و شەهادت لەڕێگەی ئازادی هاونیشتمانیەکانی و وڵاتەکەی هەڵبژێرێت و نەک هیچ چاوەڕوانی و تەموحێکی بۆ دەسەڵات و ماڵ و سامان نەبێ، بەڵکوو هەموو خۆشی و ماڵ و ژیانی لەو ڕێگەیەدا دابنێ و فیدای بکات.
ڕێگەی خەبات بۆ ئازادی، بەدرێژایی مێژووی زوڵم کردن بەسەر کورد دا لێوانلێو بوە لەهەوراز و نشێو و تاڵی و نەهامەتیەک کە زاڵمان و مرۆڤ کوژان سەپاندویانەتە سەرمان و هەروەها لەبەرانبەردا پڕە لەکۆڵنەدان و خۆڕاگری ئێمەی کوردی ئازادیخواز، کە ئازادی نیشتمانەکەمان خاڵێکی بەرزترە لەپاراستنی گیانمان و بە دانان و پێشکەش کردنی ژیانمان و بە هیوای ئازادی ڕێگەخۆشکەر دەبین لەو بزاڤەداو هەنگاوی هاوڕێ و هاوباوڕانمان بۆ گەیشتن بە ئازادی و ڕزگاری قورستر دەکەینەوە.
دەسەڵاتی سپڵەو دژە خەڵکی ئاخوندەکان، ساڵانێکە بانگەشەی ئەوە دەکات کە هێز و لایەنە ئوپوزسیونە کوردیەکان کە بەدژی حکومەتەکەی وستاون، خۆشەویستی خەڵک نین و بە تاقم و دەستە ناویان دەبات بەڵام هەرکات کە دەکەوێتە ژێر فشار و مەترسی یەکەم پەل هاویشتنی بۆ سەر حیزبەکان دەبێت و بە بانگەوازێکی ئەو حیزبانە کە هەڵقوڵاو و خۆشەویستی خەڵکن چۆکی دەشکێتەوەو لەترسی خۆی دا فشارەکانی هەتا بتوانێت زۆرتر دەکات تا بەڵکوو بتوانێت خۆی لەو دۆخەدا دەرباز بکات. کە بەپێچەوانە هەموو ساڵێک دەبینین کە ئەو خەڵکه بەوجەو بەشەرەفە چەندە بە هاودڵی و شەهامەتەوه بەدەم بانگەوازەکان دەچن و سیمای وەفاداری خۆیان و هاوئاهەنگیان لەگەڵ حیزبە نەتەوە دۆستەکان دەنوێنن و دەبن بە دڵگەرمی بۆ مانەوەمان لەم ڕێگە پڕ بایەخەدا.
ئەمساڵیش هەر وەک سەڵانی رابەدوو وە بەتایبەت لە دوو ساڵی رابردوودا خەڵکی ئازادیخواز و بەهەڵوێست لە کوردستان داواکاری بۆ مانگرتنی گشتییان بەهێند وەرگرت و بە خۆڵقاندنی حەماسەیەکی دیکە سەلماندیانەوە کە پێشمەرگە لە ناخ و دڵی خەڵک دایەو هیچ جێگەیەک بۆ داگیرکەران و مۆرە بەکرێکیراوەکانی رژیمی ئاخوندی ئێران لە کوردستان دا بوونی نیە.
هەرچەند کە رژیم تەواوی هەوڵی خۆی دا تا بە زۆر خستن بۆ سەر حیزبەکان و فشار بۆ هاووڵاتیان و چالاکانی سیاسی و مەدەنی لەناوخۆی وڵات دا، پێش بەو مانگرتنە بگرێت بەڵام جارێکی دیکە ئازادیخوزان و خاوەن هەڵوێستە بوێرەکانی کوردستان نا یەکی دیکەیان بەو دەسەڵاتە وتەوە کە بزانێت ئاگری شۆڕشی ژینا نەکوژاوەتەو، وە دووبارە بڵێسە دەکێشێت و بناغەیان دەسووتێنێت.
لێرەدا پێویستە ئاماژەی پێ بکەمەوە کە ئێمەی پێشمەرگە لەهەر حاڵەت و دۆخێکدا هەر پێشمەرگەین تەنانەت بە مردنیش هەر پێشمەرگەین و پێشمەرگە دەمێنین و بوینەتە مۆتەکەی ئەو دەسەڵاتە نەگریسە. کە ئەگەر وا نەبوا ئەو دەسەڵاتە مرۆڤ کوژە گڵگۆی شەهیدانی ڕێگەی ئازادی حەشار نەئەداو لەپێش چاوی خەڵک ونیانی نەدەکرد. هەر بویە زیندوو یان مردوو کەم ئەندام و تەندروست چەکدار و بێ چەک ئازاد و بەندکراویش کە بین هەر پێشمەرگەین و هەر پێشمەرگە دەمێنین.
ئەوەی کە هیچ دەسەڵاتێکی خۆسەپێن نەیتوانیوە لەناخی خەڵکی ئازادیخوازدا بیکوژێت نیشتمان پەروەری و ڕزگاریخوازیە. چونکە بۆ هیچ پێشمەرگەیەکی ڕاستەقینەو نیشتمان پەروەر هیچ سەربەرزی و شانازیەک ناگات بە گیان فیدایی بۆ وڵات و ئازادی هاووڵاتیانمان.
بۆیە ئێمەش هەتا بمێنین و هەناسەمان بێت و هەتا دوایین دڵۆپی خوێنمان هەر پێشمەرگەی خاک و نیشتمانین، هیچ رژیم و دەسەڵاتێکی داگیرکەر ناتوانێت خولیای ئازادی لە ئێمەدا بکوژێت و هەتا گەیشتنی نەتەوە نیشتمان بە ئازادی و رزگاری، بەردەوام دەبین لەم رێگەیە دا.
