بەپێی راپۆرتەکان، سێ بەندکراوی سیاسیی کورد کە پێشتر بە مەبەستی گواستنەوەیان بۆ زیندانی شارەکانی خۆیان بۆ شوێنێکی نادیار ڕاگوێزرابوون، بۆ شوێنەکەی پێشویان لە بەندی چواری هۆڵی 12ی گرتووخانەی رەجایی شار گەڕێندرانەوە.
ئەو سێ بەندکراوە سیاسییە بە فەرمانی بەرپرسانی زیندان بۆ شوێنێکی نادیار ڕاگوێزرابوون، بەڵام بە بیانووی وون بوونی پەروەندەکانیان دیسان گەڕێندراونەتەوە شوێنی خۆیان.
ناوی ئەو زیندانییانە بریتیە لە: “عومەر فەقیەپوور” خەڵکی مەهاباد، “محەممەد نەزەری” خەڵکی ساین قەڵا و “خالید فەرەیدوونی” خەڵکی مەهاباد کە هەر سێکیان حوکمی زیندانی هەتاهەتاییان بەسەردا سەپاوە، کە بڕیار بوو بۆ زیندانی شارەکانی خۆیان ڕایانگوێزن بەڵام بەبیانووی ون بوونی پەروەندەکانیان رێگریان لە گواستنەوەیان کرد.
ئەو سێ زیندانییە سیاسیە کە بە تۆمەتی پێوەندی لەگەڵ ئەحزابی سیاسیی کوردستان بەندکراون، پێشتر بۆ ڕاگواستنیان بۆ زیندانی شارەکانی خۆیان، چەندین نامەیان بۆ بەرپرسانی زیندان ناردبوو بەڵام هەتا ئێستا هیچ وەلامێکی ئەرێنیان نەدراوەتەوە.
