لەمێژووی خەباتی پڕ لەهەوراز و نشێوی گەلەکەماندا، هەندێک ڕۆژ هەن کە رۆژانی ئاسایی نین لەلاپەڕەکانی مێژوودا ، بەڵکوئەو رۆژە دەگمەنانە بوونە پێناسەو سەرەتای قافڵەسالاری و وێستگەی وەرچەرخان و هێمای خۆڕاگری. پێنجی خەرمانان یەکێکە لەو ڕۆژە پڕشنگدارانە کە بووە هەوێنی شۆڕشێکی خۆماڵیانەو بووە ئەستێرەیەک لەشەوەزەنگی نائومێدیدا. ٤٥ ساڵ لەمەوبەر، پێنجی خەرمانان بووە ڕۆژی داگیرساندنی چراو مەشخەڵی ڕووناکی کە تا ئەمڕۆش ڕێگای تێکۆشەرانی ئازادی ڕووناک دەکاتەوە.
کاتێک ئاسمانی کوردستان بە هەوری ڕەشی ستەم و سەرکوت داپۆشرابوو و گەلی کورد ڕووبەڕووی دڕندانەترین هێرش و سیاسەتی دوژمنکارانەی رژیمی ئاخوندی ببۆوە، مامۆستایەکی ئایینی خاوەن هەڵوێست و ڕێبەرێکی نەتەوەیی و نیشتمانی، مامۆستا سەید جەلال حوسێنی، لەگەڵ پۆلێک لەهاوڕێیانی، بڕیارێکی مێژووییان داو لەپێنجی خەرمانانی ١٣٥٩دا، بناغەی تەشکیلاتێکیان دانا کە بووە هۆی ئومێدو دڵخۆشی دانیشتوانی کوردستان، تەشکیلاتێک کە لەسەر بنەمای باوەڕی پتەو بە مافی نەتەوەو خۆشەویستی بۆ نیشتمان.
دامەزراندنی سازمانی خەبات، تەنها دروستکردنی حیزبێک نەبوو، بەڵکو سەنگەرێک بوو کە تێیدا باوەڕ بە کوردایەتی، ئازایەتی و فیداکاری، ببوونە چەکی سەرەکی. لەپێنجی خەرماناندا دەنگی ئەو تێکۆشەرانە بەرزکرایەوە کە دەیانویست بە دوژمن بڵێن: "ئێمە لێرەین، بە باوەڕێکی پۆڵایینەوە پارێزگاری لەناسنامە و کەرامەتی گەلەکەمان دەکەین."
لاپەڕەکانی مێژووی سازمانی خەبات بە خوێنی گەشی دەیان شەهیدی نەمر نەخشێنراوە. ئەو قارەمانانەی لەسەنگەری شەرەفدا گیانیان بەخشی و ئەوانەی لەقووڵایی زیندانە تاریکەکانی ڕژیمدا، لەژێر ئەشکەنجەدا ئاڵای ورەیان دانەنەواند و تا دوا هەناسە سرودی ئازادی و بەرخۆدانیان دەوتەوە. ناوی ئەوان بۆ هەمیشە وەک ئەستێرە لەئاسمانی کوردستاندا دەدرەوشێتەوە و چیرۆکی قارەمانێتییان دەبێتە وانەیەک بۆ نەوەکانی داهاتوو.
شانازیی سازمانی خەبات تەنیا لەقوربانیداندا نییە، بەڵکو لەژیریی سیاسی و خوێندنەوەی سەردەمیانەشدایە. سازمانی خەبات توانیویەتی شانبەشانی گۆڕانکارییەکان گەشە بکات و وەک هێزێکی نەتەوەیی و نیشتمانی، هەمیشە لەسەنگەری دیفاعکردن لەمافەکانی گەلی کوردو تێکۆشان بۆ دامەزراندنی سیستمێکی دادپەروەردا، ڕۆڵی خۆی ببینێت.
ئەمڕۆ کە یادی پێنجی خەرمانان دەکەینەوە، ئێمە تەنیا دڵخۆش نین بەسەروەرییەکانی ڕابردوو بەڵکو دڵخۆشین بەوە کە دەتوانین داهاتووی گەش بۆ گەلەکەمان و نیشتمان دەستەبەر کەین و خۆمان رووسووری مەیدانی شۆڕش و تێکۆشانی ئازادی خوازی و نیشتمان و نەتەوە خۆشەویستی بین. ئێمە رێبوارانی رێبازی سازمانی خەبات، پەیمان لەگەڵ گیانی پاکی مامۆستا سەید جەلال حوسەینی و سەرجەم شەهیدانی ڕێگای ڕزگاری نوێ دەکەینەوە کە تا گەیشتن بە ئامانجە پیرۆزەکان، تا بەدیهێنانی ئازادی و سەربەخۆیی نیشتمان، کۆڵ نەدەین و درێژەپێدەری ڕێگا پڕ لەشانازییان بین.پێنجی خەرمانان وزە و هێزێکە کە ساڵانە لەناخماندا نوێ دەبێتەوە و پێمان دەڵێت: خەبات بەردەوامە و سەرکەوتن هەر دێت.
