سكرتێری گشتیی سازمانی خەبات هێرشی تیرۆریستی بۆ سەر كۆرمۆر لە هەرێمی كوردستان بە توندی مەحکووم دەكات هەواڵی هێرشی ترۆریستی لە ڕێگەی درۆن و مووشەك، لە شەوی چوارشەممە ٢٦ی نۆڤەمبەری ٢٠٢٥ بۆ سەر دامەزراوەی ئابووریی گرینگ و سەرچاوەی گاز، كە ناسراوە بە كۆرمۆر لە دەوروبەری شاری چەمچەماڵ لە هەرێمی كوردستان، بە توندی مەحکووم دەكەم. ئەو كردەوە ترۆریستییە و ئەو تاوانە گەورەیە، بووەتە هۆی زیان گەیاندن بەو دامەزراوە ئابوورییە و لە ئێستادا گاز و برق و ڕووناکیی ماڵ و شوێنی ژیانی خەڵكی هەرێمی كوردستان بە شێوەیەكی گشتی نەماوە یان زۆر كەم بووەتەوە. ئاشكرایە ڕژیمی ئاخوندی و دەست و پێوەند و بەكرێگیراوەكانی لە عێراقدا لە پشت ئەو تاوانە گەورەیەن. ئەوە یەکەمین جار نییە ڕژیمی ئێران و هاوکارەکانی کردەوەی ترۆریستی و هێرش دەکەنە سەر دامەزراوەکانی هەرێمی کوردستان و لە ڕابردوودا دەیان هێرشی دیکەیان بۆ سەر هەرێمی كوردستان ئەنجام داوە. بە ناوی خۆم و تێكۆشەرانی ڕیزەكانی سازمانی خەبات، بە توندی كردەوەی ترۆریستی و جینایەتی ڕژیمی ئاخوندی و بەكرێگیراوانی بۆ سەر مەیدانی گاز لە كۆرمۆر مەحکووم دەكەم. هەروەها داوا لە هێز و لایەنە سیاسییەکانی هەرێمی كوردستان دەكەم لە بەرانبەر پیلانەكانی ڕژیمی ئاخوندیی ئێران یەكگرتوو بن و بە یەكگرتوویی و یەكدەنگی لە بەرانبەر پیلانە تیرۆریستی و جینایەتەكانی ڕژیمی ئاخوندی و دەست و پەیوەندەكانی بوێستنەوە. سازمانی خەباتی كوردستانی ئێران سكرتێری گشتی بابەشێخ حوسەینی ٦ی سەرماوەزی ١٤٠٤ی كۆچیی خۆری ٢٧ی نۆڤەمبەری ٢٠٢٥
