هاونیشتمانیانی تێکۆشەر!
خەڵکی ئازادیخوازی ئێران! جارێکی دیکە شەپۆلی ناڕەزایەتی و ڕاپەڕینی ئێوەی تێکۆشەر لە ئێران و کوردستان دژی زوڵم و چەوساندنەوەی ڕژیمی ئاخوندی، دەرخەری ئەو ڕاستیەیە کە گەلانی ئێران ئامادە نین مل بۆ دەسەڵاتی سەرکوتکەری ئاخوندی کەچ بکەن و خوازیاری گۆڕانکاری بنەڕەتی و ڕوخانی ئەو ڕژێمەن.
کومیسیۆنی تەشکیلاتی سازمان خەبات ی کوردستانی ئێران، وێڕای پشتیوانی لە بانگەوازی گشتی حەوت هێز و لایەنی سیاسیی کوردستانی ئێران بۆ مانگرتنی گشتی ڕۆژی پێنجشەممە ۱۸ی بەفرانباری ۱۴۰۴ و پشتیوانی لە ناڕەزایەتییە گشتیەکان لە ئێران و کوردستان، دەستخۆشی لە ئازایەتی و بوێریی لاوان، ژنان، پیاوان و چین و توێژەکانی مەیدانی خەبات دەکات کە بە دەستی بەتاڵ بەڵام بە ئیرادەیەکی پۆڵایینەوە ڕووبەڕووی هێزە سەرکوتکەرەکان بوونەتەوە.
بەداخەوە لەم ڕووبەڕوبونەوانەدا، ڕژیمی خوێنڕێژ، ڕۆڵەکانی گەل و ئازیزانی شەهید و بریندار کردوەو بێ بەزەییانە سەرکوتی ناڕەزایەتیەکان دەکات. ئێمە وێڕای مەحکوومکردنی تاوانانە بەردەوامەکانی دەسەڵاتی دیکتاتۆری ئێران، ڕێز بۆ شەهیدانی ڕێگەی ئازادی دەردەبڕین و هاوخەمیی قوڵمان بە بنەماڵەی سەربەرزی شەهیدان ڕادەگەێنین.
لێرەدا سڵاو بۆ خۆڕاگریی خەڵکی قارەمانی پارێزگای ئیلام و لۆڕستان دەنێرین و پرسەو سەرەخۆشیی تایبەتی بە خەڵکی شەهیدپەروەری مەلەکشایی دەڵەین کە هەمیشە لە ڕیزەکانی پێشەوەی دیفاع لە خاک و نیشتماندا بوون و لەم ڕاپەڕینەشدا بە پێشکەشکردنی ڕۆڵەکانیان، سەلماندیان کە مەشخەڵی خەبات لەو دەڤەرە بڵێسە دەدات.
دڵنیاین کە خوێنی شەهیدان بەفیڕۆ ناچێت و دەبێتە هەوێنی یەکگرتوویی زیاتر بۆ ڕیشەکێشکردنی ڕژیمی ئاخوندی.
سەرکەوتن بۆ گەلی کوردو گەلانی ئێران
نەمان بۆ ڕژێمی ئاخوندی
کۆمسیۆنی تەشکیلاتی سازمان خەبات ی کوردستانی ئێران
